Հյուսիսային Կորեա անցած ԱՄՆ քաղաքացին զինվոր է․ միջադեպի շուրջ նոր մանրամասներ են հաղորդվել
Հյուսիսային Կորեա անցած ԱՄՆ քաղաքացին շարքային զինվոր Թրևիս Քինգն է, որն, ըստ ԱՄՆ ռազմական գերատեսչության պաշտոնյաների, Հարավային Կորեայի և Հյուսիսային Կորեայի սահմանազատման գիծն անցել է «իր կամքով և առանց թույլտվության»։ Այս մասին հաղորդում է CNN-ը՝ նշելով, որ այս միջադեպը կարող է «դիվանագիտական գլխացավանք» առաջացնել ԱՄՆ-ի համար։
Նշվում է, որ 23-ամյա Թրևիսը Հարավային Կորեայում 50 օր անցկացրել է բանտում օրենքը խախտելու համար։ Ազատ արձակվելուց հետո նրան տարել են օդանավակայան, որպեսզի վերադարձնեն ԱՄՆ և կարգապահական տույժի ենթարկեն։ Սակայն Թրևիսն ինչ-որ պահի հեռացել է օդանավակայանից, միացել զբոսաշրջիկների խմբին և նրանց հետ մեկնել դեպի Անվտանգության համատեղ տարածք։ Այնուհետև նա հատել է սահմանազատման գիծը և հայտնվել Հյուսիսային Կորեայի տարածքում։
Իր հերթին Yonhap գործակալությունը նշում է, որ ԱՄՆ զինվորին Սեուլում տուգանել են ոստիկանության պարեկային մեքենային ոտքով հարվածելու համար և նյութական վնաս հասցնելու համար։
Թրևիս Քինգը ծառայում էր Կորեայում տեղակայված ԱՄՆ ուժերում։
Միջադեպը հետաքննվում է Կորեայում տեղակայված ԱՄՆ ուժերի կողմից։ Պենտագոնից հայտնել են, որ մտահոգված են Քինգի վիճակի մասին և հետևում են իրավիճակին։ ԱՄՆ զինվորականները զինվորի հետ կապ չեն հաստատել։
ՄԱԿ-ի հրամանատարությունը, որը գործում է Ապառազմականացված գոտում և Անվտանգության համատեղ տարածքում, ավելի վաղ հայտնել էր, որ իրենց խումբը փորձում է կապի դուրս գալ Հյուսիսային Կորեայի զինվորականների հետ և բանակցություններ վարել զինվորի ազատ արձակման շուրջ։
Միևնույն ժամանակ պարզ չէ՝ արդյոք զինվորը դասալքել է և անցել Հյուսիսային Կորեա, թե՞ հույս ունի վերադառնալու։ Հյուսիսային Կորեան առայժմ որևէ մեկնաբանություն չի տվել այս թեմայի շուրջ։
Հարավային Կորեան և Հյուսիսային Կորեան բաժանող Ապառազմականացված գոտու սահմանը աշխարհի ամենաուժեղ ամրացված տարածքներից մեկն է: Այն ականապատված է, շրջապատված է էլեկտրական ցանկապատով և փշալարերով, ինչպես նաև հսկողության տեսախցիկներով, իսկ զինված պահակները 24 ժամ հսկում են տարածքը:
