ՄԱԳԱՏԷ-ն և Իրանը կարգավորել են օբյեկտներից մեկում ուրանի մինչև 83 % հարստացման շուրջ վեճը
Ատոմային էներգիայի միջազգային գործակալությունը (ՄԱԳԱՏԷ) փակել է Իրանի միջուկային օբյեկտներից մեկում ուրանի մինչև 83,7 % հարստացման գործի հետաքննությունը: Այս մասին հաղորդում է Mehr գործակալությունը՝ վկայակոչելով աղբյուրների։
Ըստ գործակալության՝ տեխնիկական քննարկումների ընթացքում ՄԱԳԱՏԷ-ն և Իրանը կարգավորել են Իրանի Ֆարսի նահանգի Աբադե քաղաքի օբյեկտներից մեկի հետ կապված գործը: Փակվել է նաև նմանատիպ երկրորդ գործը:
«Ավելին, փակվել է նաև ՄԱԳԱՏԷ-ի գործը՝ կապված 83.7 % մաքրության ուրանի մասնիկների հայտնաբերման հետ», – գրում է գործակալությունը:
Իր հերթին Reuters գործակալությունը հաղորդել է, որ ՄԱԳԱՏԷ-ն պետք է Իրանի վերաբերյալ եռամսյակային զեկույցները հրապարակի այս շաբաթ՝ Կառավարիչների խորհրդի հերթական նիստի նախօրյակին:
2023 թվականի մարտին ՄԱԳԱՏԷ-ի գլխավոր տնօրեն Ռաֆայել Գրոսին Թեհրան կատարած այցի ընթացքում բանակցություններ է վարել Իրանի նախագահ Էբրահիմ Ռայիսիի հետ։ Հանդիպմանը գործակալության ղեկավարը գոհունակություն է հայտնել մշակված համատեղ միջոցառումների առնչությամբ, որոնք, ըստ նրա, ենթադրում են համագործակցության հաստատում Իսլամական Հանրապետության և ՄԱԳԱՏԷ-ի միջև։
Թեհրանում գտնվելու ժամանակ Գրոսին երկու փուլով բանակցություններ է վարել Իրանի Ատոմային էներգիայի կազմակերպության ղեկավար Մոհամմադ Էսլամիի և արտաքին գործերի նախարար Հոսեյն Ամիր Աբդոլլահիանի հետ։
Փետրվարին Bloomberg գործակալությունը, հղում անելով աղբյուրների, հայտնել էր, որ ՄԱԳԱՏԷ-ի տեսուչները հերթական ստուգման արդյունքներով պարզել են, որ Իրանը, ենթադրաբար,ս ստացել է մոտ 84% հարստացված ուրան։ Ավելի ուշ Reuters-ը, վկայակոչելով գործակալության զեկույցը, հայտնել էր, որ ՄԱԳԱՏԷ-ն պահպանում է Իրանի հետ շփումները՝ պարզելու մինչև 83,7% հարստացված ուրանի մասնիկների ծագումը։ Իսկ Իրանը ՄԱԳԱՏԷ-ին տեղեկացրել էր հարստացման մակարդակի հնարավոր «չկանխամտածված տատանումների» մասին:
