Ձմեռային վերմակներ և էլեկտրական տաքացուցիչ սարքեր՝ անապահով ընտանիքներին
Շիրակի մարզի շուրջ 350 անապահով ընտանիքների տրամադրվեց ձմեռային վերմակներ և էլեկտրական տաքացուցիչ սարքեր: Նախաձեռնությունն իրականացվեց «Ձմեռակացի բարեգործական ծրագրի» շրջանակներում՝ Հայաստանում Արաբական Միացյալ Էմիրությունների դեսպանության և ՀՀ աշխատանքի ու սոցիալական հարցերի նախարարության հետ համագործակցության շրջանակներում, ինչպես նաև էմիրաթական «Կարմիր մահիկ» բարեգործական կազմակերպության ֆինանսական աջակցությամբ:
Դեսպանատնից տեղեկացրին, որ մարդասիրական ծրագրի ընթացքում արդեն իսկ օգնության արկղեր են տրամադրվել Գեղարքունիքի և Արմավիրի մարզերի շուրջ 500 անապահով ընտանիքների։ Առաջիկա օրերին նախատեսվում է մարդասիրական ծրագիրն իրականացնել Արագածոտնի, Վայոց Ձորի և Սյունիքի մարզերում։ Ընդհանուր առմամբ ծրագրի շրջանակում մարդասիրական ծանրոցներ կտրամադրվեն ավելի քան 1350 անապահով ընտանիքների։ Նախագիծն ամենամյա է և իրականացվում է աշխարհի տարբեր երկրներում:
