«Տեղյակ չեմ, չենք ստացել, ես էլ, մի քանի օր է, ԱԺ-ում չեմ եղել, տեղեկացված չեմ». Ալեն Սիմոնյան

ԱԺ նախագահության ընտրություններից հետո խորհրդարանի աշխատանքն ընդհատվեց՝ սպասելով առաջին նիստի օրակարգում կառավարության առաջարկությամբ ընդգրկված հարցերի՝ «Կառավարության կառուցվածքի փոփոխության վերաբերյալ» օրենքի նախագծի և Կառավարության ծրագրի քննարկումներին։ Այդ նախագծերը ԱԺ դեռևս չեն ներկայացվել։ Եվ պաշտոնապես որևէ տեղեկություն չկա, թե ե՞րբ են վերսկսվելու խորհրդարանի նիստերը։

ԱԺ փոխնախագահ Ալեն Սիմոնյանը 168.am-ի հետ զրույցում նշեց, որ տեղեկություն չունի, թե այդ նախագծերը երբ են բերվելու ԱԺ։ Նա հայտնեց, որ փետրվարի 5-6-7-ին ԱԺ նիստեր են լինելու։

Հարցին, թե ի՞նչ օրակարգով, Ա.Սիմոնյանը պատասխանեց. «Տեղյակ չեմ, չենք ստացել, ես էլ, մի քանի օր է, ԱԺ-ում չեմ եղել, տեղեկացված չեմ։ Կարծում եմ՝ կարող է նաև կառավարության կառուցվածքի հետ կապված այդ հարցը լինել։ Չեմ բացառում»։

Նշենք, որ կառավարության ձևավորումից հետո 20-օրյա ժամկետում պետք է հաստատվի կառավարության ծրագիրը։ Ներկայիս գործադիր մարմնի անդամները նշանակվել են հունվարի 18-ին։ Այսինքն՝ ժամանակ այնքան էլ շատ չի մնացել։