ԱՄՆ-ն և Իրանը մոտ են պատերազմի ավարտին ուղղված հուշագրի ստորագրմանը. ԶԼՄ-ներ
Սպիտակ տունը կարծում է, որ մոտ է Իրանի հետ 1-էջանոց փոխըմբռնման հուշագրի շուրջ համաձայնության։ Այս մասին հաղորդում է Axios լրատվական հարթակը՝ վկայակոչելով մի քանի աղբյուրի։
Նշվում է, որ հուշագիրն ուղղված կլինի պատերազմի դադարեցմանը և կսահմանի միջուկային խնդրի շուրջ ավելի մանրամասն բանակցությունների շրջանակը։ ԱՄՆ-ն սպասում է կարևոր կետերի շուրջ Իրանի պատասխանին առաջիկա 48 ժամվա ընթացքում։ Լրատվամիջոցը նշում է, որ ի թիվս այլ դրույթների՝ համաձայնությունը կներառի Իրանի կողմից ուրանի հարստացման մորատորիումի պահպանում, ԱՄՆ-ի կողմից պատժամիջոցների վերացում և իրանական միլիարդավոր դոլար սառեցված ակտիվների ապասառեցում։ Բացի այդ, երկու կողմերը կվերացնեն Հորմուզի նեղուցով տարանցման սահմանափակումները։
Վկայակոչելով պակիստանցի միջնորդի, որը տեղյակ է բանակցություններից, Reuters գործակալությունը նույնպես նշում է, որ ԱՄՆ-ն և Իրանը շուտով կհամաձայնեցնեն պատերազմի ավարտի շուրջ 1-էջանոց հուշագիրը։
Ավելի վաղ ԱՄՆ նախագահ Դոնալդ Թրամփը հայտարարել էր, որ դադարեցնում է Հորմուզի նեղուցում արգելափակված նավերի ուղեկցման գործողությունը, քանի որ Իրանի հետ համաձայնագրի կնքման հարցում «մեծ առաջընթաց» է գրանցվել։
