Ռուբիոն հայտնել է, որ Իրանի դեմ «Էպիկական ցասում» ռազմական գործողությունն ավարտված է
ԱՄՆ նախագահ Դոնալդ Թրամփի կողմից Հորմուզի նեղուցում նավերի ուղեկցման գործողությունը դադարեցնելու մասին հայտարարությունից առաջ պետքարտուղար Մարկո Ռուբիոն Սպիտակ տանը ճեպազրույցի ժամանակ հայտարարել է, որ Իրանի դեմ փետրվարի 28-ին մեկնարկած «Էպիկական ցասում» գործողությունն ավարտված է։ Ճեպազրույցի սղագրությունը տարածել է ԱՄՆ պետքարտուղարության մամուլի ծառայությունը։
««Էպիկական ցասում» գործողությունն ավարտված է։ Նախագահը Կոնգրեսին տեղեկացրել է, որ գործողության այդ փուլն ավարտված է», – ասել է Ռուբիոն։
Ինչ վերաբերում է բանակցություններին, Ռուբիոյի խոսքով՝ հարցը ոչ միայն ուրանի հարստացումն է, այլև 2025 թ. հունիսի ամերիկյան հարվածներից հետո գետնի տակ թաղված միջուկային նյութի հետագա ճակատագիրը, որն առանցքային կետ է ԱՄՆ-ի համար։
ԱՄՆ պետքարտուղարը նաև նշել է, որ Վաշինգտոնը նախընտրում է «խաղաղության ուղին»։
«Նախագահը կնախընտրեր համաձայնության գալ։ Նա կնախընտրել նստել, մշակել փոխըմբռնման հուշագիր հետագա բանակցությունների վերաբերյալ, որոնք կհասցեագրեին բոլոր կարևոր թեմաները, նեղուցի լիարժեք բացումը, – ասել է նա։ – Սա այն ուղին է, որը նա նախընտրում է։ Մինչ այժմ սա այն ուղին չէ, որն Իրանն ընտրել է»։
Ինչ վերաբերում է Հորմուզով նավերի ուղեկցման «Ազատություն նախագիծ» գործողությանը, որն ԱՄՆ-ն արդեն դադարեցրել է, Ռուբիոն նշել է, որ այն պաշտպանական բնույթ ունի։ Նա հայտնել է, որ 87 երկրի 23 000 քաղաքացիական անձ արգելափակված է նեղուցում գտնվող նավերում. նրանք գտնվում են շատ ծանր վիճակում, մեկուսացված են, ունեն սննդի և ջրի պակաս։ Ռուբիոյի խոսքով՝ առնվազն 10 նավաստի մահացել է այս իրավիճակի պատճառով։
