ԱՄՆ-ն հաղորդել է Խաղաղ օվկիանոսում նավերին նոր հարվածներ հասցնելու մասին
ԱՄՆ զինված ուժերի Հարավային հրամանատարությունը (SOUTHCOM) հայտարարել է, որ անցած հանգստյան օրերին երկու հարված է հասցրել նավերին, որոնք, ըստ ամերիկյան հետախուզության տվյալների, շահագործվում էին ահաբեկչական կազմակերպությունների ցանկում ներգրավված ընկերությունների կողմից և զբաղվում էին Խաղաղ օվկիանոսի արևելյան մասում թմրանյութերի փոխադրմամբ։ Այս մասին նշվում է SOUTHCOM-ի տարածած հաղորդագրության մեջ:
«ԱՄՆ Հարավային հրամանատարության հրամանատար գեներալ Ֆրենսիս Դոնովանի ցուցումով «Հարավային նիզակ» առաքելության միացյալ օպերատիվ խումբը երկու մահացու կինետիկ հարված է հասցրել երկու նավի, որոնք շահագործվում էին ահաբեկչական ճանաչված կազմակերպությունների կողմից», – ասվում է հաղորդագրության մեջ։
Ինչպես պնդում է SOUTHCOM-ը, երկու նավն էլ ընթանում էին թմրամաքսանենգության հայտնի երթուղիներով և մասնակցել են թմրանյութերի առևտրին։ Հրամանատարության տվյալների համաձայն՝ առաջին հարվածի հետևանքով ոչնչացվել է երկու տղամարդ, մեկը ողջ է մնացել։ Երկրորդ հարվածի ժամանակ, ըստ ամերիկացի զինվորականների, զոհվել է երեք տղամարդ։
Հարվածից հետո ԱՄՆ Հարավային հրամանատարությունը առափնյա պահպանության ծառայությանը տեղեկացրել է, որ հարկավոր է որոնողափրկարարական գործողություն սկսել ողջ մնացածին հայտնաբերելու համար։ Հրամանատարությունում ընդգծել են, որ գործողության ընթացքում ամերիկացի զինվորականներ չեն տուժել։
