Ուկրաինայի արտգործնախարարը խոսել է ԱՄՆ պետքարտուղարի հետ G7 գագաթաժողովի շրջանակում
Ուկրաինայի արտաքին գործերի նախարար Անդրեյ Սիբիգան հայտնել է, որ Միացյալ Նահանգները շարունակում է վճռորոշ դեր խաղալ Ուկրաինայում պատերազմի խաղաղ կարգավորման գործում: Նա հանդիպել է ԱՄՆ պետքարտուղար Մարկո Ռուբիոյի հետ Ֆրանսիայում G7-ի նախարարական հանդիպման շրջանակում։
«ԱՄՆ դերը խաղաղության ջանքերի առաջմղման գործում շարունակում է մնալ կարեւորագույնը: Ուկրաինայի առաջարկներն իրատեսական եւ իրագործելի են: Ռուսաստանի վրա ճնշումը գլխավորն է Մոսկվային պատերազմը դադարեցնել ստիպելու համար»,- գրել է Սիբիգան Х-ում։
Ուկրաինայի, Ռուսաստանի եւ Միացյալ Նահանգների ներկայացուցիչների եռակողմ հանդիպումներն անորոշ ժամանակով հետաձգվել են Մերձավոր Արեւելքում պատերազմի պատճառով: Կրեմլի ներկայացուցիչ Դմիտրի Պեսկովը երեկ պնդել է, որ Մոսկվան չի կորցրել հետաքրքրությունը բանակցությունների նկատմամբ։
Սիբիգայի խոսքով՝ Ռուբիոյի հետ քննարկել է Մերձավոր Արեւելքում տեղի ունեցող իրադարձությունները։ «Ուկրաինայի դիրքորոշումն այն է, որ Մոսկվայի եւ Թեհրանի ռեժիմները համատեղ աշխատում են պատերազմը երկարաձգելու համար։ Եվ երկու ռեժիմներն էլ պետք է բախվեն համախմբված ճնշման»,- գրել է նա։
«Ուկրաինայի դեմ ռուսական ագրեսիային հակազդելու հարցը պետք է մնա միջազգային օրակարգի առաջնային պլանում»,- նշել է Ուկրաինայի արտգործնախարարը։
