ՄԱԿ-ում ԱՄՆ-ին կոչ են արել արագ ավարտել Մինաբի դպրոցին հարվածի հետաքննությունը
ՄԱԿ-ի մարդու իրավունքների գերագույն հանձնակատար Վոլկեր Տյուրկն ԱՄՆ իշխանություններին կոչ է արել հնարավորինս շուտ ավարտել և հրապարակել հետաքննության արդյունքները՝ կապված Իրանի հարավի Մինաբ քաղաքում տարրական օրիորդաց դպրոցին հասցված հարվածի հետ, որի հետևանքով շուրջ 170 երեխա էր զոհվել։
Այս մասին նա ասել է ՄԱԿ-ի Մարդու իրավունքների խորհրդի 61-րդ նստաշրջանի շրջանակներում անցկացված արտակարգ քննարկումների ընթացքում, որոնք կազմակերպվել էին Իրանի, Չինաստանի և Կուբայի խնդրանքով։
Հանձնակատարի խոսքով՝ Մինաբի «Շաջարե Թայեբե» տարրական դպրոցի ռմբակոծությունն առաջացրել է միջազգային հանրության «խորը սարսափը»։
«Ռումբերից ավերված դասարանների և սգացող ծնողների կադրերը հստակ ցույց են տվել, թե ով է վճարում պատերազմի համար ամենաբարձր գինը. խաղաղ բնակիչները, որոնք ոչ մի ազդեցություն չունեն հակամարտությանը հանգեցրած որոշումների վրա», – նրա խոսքերն է մեջբերում ՏԱՍՍ-ը։
Տյուրկը հիշեցրել է, որ ԱՄՆ բարձրաստիճան պաշտոնատար անձինք հայտնել են այդ հարվածի գործով հետաքննություն անցկացնելու մասին։
«Ես կոչ եմ անում այս գործընթացն ավարտել հնարավորինս շուտ և հրապարակել դրա արդյունքները։ Այս սարսափելի վնասը չպետք է անպատիժ մնա», – նշել է նա։
Փետրվարի 28-ին՝ ամերիկա-իսրայելական հարվածների առաջին օրը, Իրանի իշխանությունները հայտնել են, որ հարվածի տակ է հայտնվել Մինաբ քաղաքի տարրական օրիորդաց դպրոցը։ Վերջին տվյալներով՝ զոհվել է 175 մարդ՝ հիմնականում աշակերտուհիներ, ինչպես նաև ծնողներ և ուսուցիչներ։ Եվս 95 մարդ վիրավորվել է։ ԱՄՆ նախագահ Դոնալդ Թրամփը հարձակման համար մեղադրել է Իրանի զինված ուժերին՝ առանց ապացույցներ ներկայացնելու։ Ավելի ուշ պարզվել է, որ հարվածի վայրում հայտնաբերված հրթիռային բեկորներն ունեն ամերիկյան զինամթերքի մակնշում:
