Թուրքիան հայտարարել է, որ ՆԱՏՕ-ն լրացուցիչ պաշտպանական ուժեր է տեղակայում հարավային բազան պաշտպանելու համար
ՆԱՏՕ-ն ամերիկյան ևս մեկ «Պատրիոտ» հակահրթիռային համակարգ է տեղակայում Թուրքիայի հարավային Ադանա նահանգում, որտեղ գտնվող «Ինջիրլիք» ավիաբազայում տեղակայված են ԱՄՆ-ի և այլ երկրների անձնակազմեր:
Այս մասին հայտարարել է Թուրքիայի պաշտպանության նախարարությունը։
«Մեր օդային տարածքի և մեր քաղաքացիների անվտանգությունն ապահովելու համար ազգային մակարդակով ձեռնարկված միջոցառումներից բացի, Ադանայում տեղակայվում է Ռամշտայնում գտնվող դաշնակիցների օդային հրամանատարության կողմից պատվիրված ևս մեկ «Պատրիոտ» համակարգ՝ այնտեղ տեղակայված արդեն իսկ գոյություն ունեցող իսպանական «Պատրիոտ» համակարգին զուգահեռ», – նշվել է հայտարարության մեջ:
Անդրադառնալով Թուրքիայի պաշտպանության նախարարության հայտարարությանը, Reuters գործակալությունը հիշեցրել է, որ Թուրքիան, որն ունի ՆԱՏՕ-ի երկրորդ ամենամեծ բանակը և հարևան է Իրանին, նախորդ շաբաթ հայտարարել էր, որ դաշինքը «Պատրիոտ» համակարգ է տեղակայել իր հարավարևելյան Մալաթիա նահանգում՝ ՆԱՏՕ-ի ռադարային բազայի մոտ, որպես Իրանի պատերազմից բխող հրթիռային սպառնալիքներից օդային պաշտպանությունը բարելավելու քայլերի մաս։ Ադանայում է գտնվում Թուրքիայի «Ինջիրլիք» ավիաբազան, որտեղ տեղակայված են ԱՄՆ-ից, Կատարից, Իսպանիայից և Լեհաստանից ժամանած անձնակազմ, ինչպես նաև թուրքական զորքեր։
Գործակալությունը հավելել է, որ Թուրքիան, որը համաշխարհային պաշտպանական արդյունաբերության զարգացող առաջատարներ երկրներից մեկն է, չնայած զարգացմանն ուղղված ջանքերին, չունի սեփական լիարժեք հակաօդային պաշտպանություն և պատերազմի սկսվելուց ի վեր ապավինել է Միջերկրական ծովի արևելքում տեղակայված ՆԱՏՕ-ի հակաօդային պաշտպանությանը՝ Իրանից արձակված երեք հրթիռները որսալու համար։
