Ադրբեջանը վերացրել է Իրանից բեռնափոխադրողների մուտքի ու ելքի սահմանափակումները
Ադրբեջանը վերացրել է իր երկրի տարածք մուտքի և ելքի սահմանափակումները իրանցի բեռնափոխադրողների համար։
Այս մասին հայտնում են ադրբեջանական ԶԼՄ-ները:
«Ադրբեջանի և Իրանի միջև պետական սահմանի անցակետերով բեռների փոխադրման նպատակով բոլոր տեսակի տրանսպորտային միջոցների մուտքն ու ելքը (ներառյալ տարանցիկ նպատակներով) վերականգնվել է այսօր, ժամը 10:00-ից»,-նշվում է հաղորդագրության մեջ։
Սահմանափակումները մտցվել էին մարտի 5-ին այն բանից հետո, երբ Ադրբեջանը մեղադրեց Իրանին Նախիջևանի օդանավակայանի ուղղությամբ ԱՍԹ-ներով գրոհ իրականացնելու մեջ։ Իրանական կողմը հաջորդող ժամերին հերքեց իր առնչությունը Նախիջևանի օդանավակայանի ուղղությամբ հարվածներին։ Մարտի 8-ին Ադրբեջանի նախագահ Իլհամ Ալիևի հետ հեռախոսազրույցի ժամանակ Իրանի նախագահ Մասուդ Փեզեշքիանը ևս հերքել էր Իրանի առնչությունն այդ գրոհներին՝ խոստանալով նաև հետաքննություն իրականացնել։
