Թրամփը խոստացել է պատասխանել Իրանին Էր Ռիադում ԱՄՆ դեսպանատան վրա հարձակման և ամերիկացի 6 զինծառայողի զոհվելու համար
Վաշինգտոնը կարձագանքի Սաուդյան Արաբիայի մայրաքաղաք Էր Ռիադում ԱՄՆ դեսպանատան վրա իրականացված հարվածին, նաև վրեժ կլուծի զոհված ամերիկացի զինվորականների համար, հայտարարել է ԱՄՆ նախագահ Դոնալդ Թրամփը NewsNation պարբերականի լրագրող Քելի Մեյերի հետ զրույցում։ Այս մասին լրագրողը հայտնել է X սոցիալական հարթակի իր էջում։
«Ես քիչ առաջ խոսեցի նախագահ Թրամփի հետ։ Նա ասաց, որ շուտով կիմանանք, թե ինչպիսին կլինի պատասխանը Էր Ռիադում ԱՄՆ դեսպանատան վրա հարձակման և սպանված ամերիկացի զինծառայողների համար», – գրել է լրագրողը։
Նրա խոսքով՝ Թրամփը նաև ասել է, որ իր կարծիքով՝ տարածաշրջանում ցամաքային ուժեր տեղակայելու անհրաժեշտություն չի լինի։
Սաուդյան Արաբիայի պաշտպանության նախարարությունն ավելի վաղ հայտնել էր, որ Էր Ռիադում ԱՄՆ դեսպանատունը թիրախավորվել է 2 անօդաչու թռչող սարքի միջոցով։ Հարձակման հետևանքով դեսպանատան տարածքում հրդեհ է բռնկվել, պատճառվել է թեթև նյութական վնաս։
Միևնույն ժամանակ, ԱՄՆ կենտրոնական հրամանատարությունը X-ում գրառման մեջ հայտնել է, որ Իրանի դեմ գործողությունների ժամանակ ամերիկացի զինվորականների շրջանում զոհերի թիվը հասել է 6-ի։ Ավելի վաղ հայտարարվել էր 4 զոհի մասին։ Նշվում է, որ ավելի վաղ անհետ կորած երկու զինծառայողի մարմինները հայտնաբերվել են Իրանի առաջին պատասխան հարվածների ընթացքում թիրախավորված օբյեկտից։
Իսրայելը և ԱՄՆ-ն փետրվարի 28-ից հարվածներ են հասցնում Իրանին, որն էլ պատասխան հարվածներ է հասցնում Իսրայելին և տարածաշրջանի երկրներում գտնվող ամերիկյան ռազմաբազաներին և էներգետիկ օբյեկտներին։
