Պակիստանի առևտրի կենտրոնում խոշոր հրդեհի հետևանքով 14 մարդ է զոհվել
Պակիստանցի հրշեջները որոնողական աշխատանքներ են իրականացնում Կարաչիի ընդարձակ առևտրի կենտրոնի ծխացող մնացորդներում՝ գտնելու տասնյակ անհետ կորած անձանց։ Այս մասին հայտնում է Reuters-ը։
Ոստիկանապետ Ջավեդ Ալամ Օդհոն հայտնել է, որ 14 մարդ զոհվել է, իսկ մոտ 60-ը անհետ կորած են համարվում։
«Փրկարարական աշխատանքները շարունակվում են, և մենք հույս ունենք, որ դրանք կավարտվեն որքան հնարավոր է շուտ, բայց չեմ կարող ժամանակացույց նշել», – ասել է նա՝ հավելելով, որ հրդեհի հետևանքով վիրավորված մոտ 18 մարդ դուրս է գրվել հիվանդանոցից։
Նախնական տվյալներով՝ հրդեհի պատճառը եղել է էլեկտրական անջատիչը։
Փրկարարները զգուշացրել են, որ հրդեհված կառույցն անկայուն է և կարող է փլուզվել ցանկացած պահի։
Հրդեհը, որը սկսվել է հունվարի 17-ի ուշ երեկոյան, Գուլ Պլազա բազմահարկ համալիրում է եղել, որտեղ տեղակայված է 1200 խանութ։
