Իսպանիայում արագընթաց գնացքներ են բախվել. առնվազն 21 մարդ մահացել է
Արագընթաց գնացքը Իսպանիայի հարավում գծերից դուրս է եկել և բախվել հանդիպակաց մեկ այլ գնացքի՝ այն դուրս մղելով գծերից։
Կատարվածի հետևանքով զոհվել է առնվազն 21 մարդ։ Ինչպես հաղորդում է Reuters գործակալությունը, այս մասին հայտնել է Իսպանիայի ներքին գործերի նախարարությունը։
Դեպքը տեղի է ունեցել հունվարի 18-ին՝ Կորդոբա նահանգի Ադամուզ քաղաքի մոտակայքում։
Անդալուզիայի տարածաշրջանային կառավարության ղեկավար Խուանմա Մորենոն հունվարի 19-ի առավոտյան լրագրողներին հայտնել է, որ հոսպիտալացված 75 մարդկանցից 15-ը գտնվում են ծանր վիճակում։ Նա նախազգուշացրել է, որ զոհերի թիվը օրվա ընթացքում կարող է ավելանալ։
«Վթարի ուժգնությունը շատ ուժեղ է եղել… մենք, հավանաբար, կգտնենք (ավելի շատ) դիակներ», – ասել է Մորենոն՝ հավելելով, որ ծանր տեխնիկա կպահանջվի գնացքների կոտրված մետաղական կտորները հեռացնելու և նոր զոհերի աճյունները հայտնաբերելու համար։
El Pais թերթը հայտնել է, որ հարվածի թիրախ դարձած՝ Մադրիդից Ուելվա ուղևորվող գնացքի 27-ամյա վարորդը մահացածների թվում է։
Նշվում է, որ երկու գնացնքներում եղել է շուրջ 400 ուղևոր, մեծամասամբ՝ իսպանացիներ։
Իսպանիայի տրանսպորտի նախարար Օսկար Պուենտեն լրագրողներին ասել է, որ վթարի պատճառը դեռևս հայտնի չէ՝ հավելելով, որ «շատ տարօրինակ» է, որ գծերից դուրս գալը տեղի է ունեցել երկաթգծի ուղիղ հատվածում։ Նա հավելել է, որ երկաթուղու այս հատվածը վերանորոգվել է մայիսին։
«Այսօր գիշերը խորը ցավի գիշեր է մեր երկրի համար», – X-ի իր էջում գրել է Իսպանիայի վարչապետ Պեդրո Սանչեսը։
Իսպանիայի արքայական ընտանիքի խոսնակն էլ տեղեկացրել է, որ թագավորն ու թագուհին մտահոգությամբ հետևում են իրադարձությունների զարգացմանը։
