Իրանում ցույցերի ֆոնին սահմանափակվել է ինտերնետի հասանելիությունը

Իրանում հիպերինֆլյացիայի և իրանական ռիալի փոխարժեքի աննախադեպ անկման պատճառով սկսված բողոքի ցույցերը շարունակվում են արդեն 12 օր։ Ցուցարարները դուրս են եկել Թեհրանի և այլ խոշոր քաղաքների փողոցներ։ Այս մասին հաղորդում է Deutsche Welle-ն։

Նշվում է, որ ըստ նորվեգական Iran Human Rights կազմակերպության տվյալների՝ զոհվել է առնվազն 45 ցուցարար, այդ թվում՝ 8 անչափահաս։ Իրանական ԶԼՄ-ներն ավելի վաղ հայտնել էին 21 զոհի մասին, որոնք շարքում կան նաև անվտանգության ուժերի ներկայացուցիչներ։

BBC-ն, վկայակոչելով իրավապաշտպան կազմակերպություններին, հաղորդում է, որ ցույցերը տարածվել են Իրանի բոլոր 31 նահանգների ավելի քան 100 քաղաքներում։ Ըստ այդ կազմակերպությունների տվյալների՝ առնվազն 34 ցուցարար է զոհվել, այդ թվում՝ 5 երեխա։ Բացի այդ, զոհվել է 8 իրավապահ։ 2270 ցուցարար ձերբակալվել է։

Ըստ բրիտանական NetBlocks կազմակերպության՝ Իրանի իշխանությունները գրեթե ամբողջովին արգելափակել են ինտերնետի հասանելիությունը։ Cloudflare IT-ընկերության տվյալներով՝ հունվարի 8-ին Իրանում ինտերնետ թրաֆիկն 90%-ով նվազել է։

Ցույցերը մեծ թափ են ստացել հունվարի 8-ի երեկոյան։ Սրանից ոչ շատ առաջ Ռեզա Փահլավին, որն այժմ ապրում է ԱՄՆ մայրաքաղաք Վաշինգտոնում, և որի հայրը գահընկեց էր արվել 1979 թվականի Իսլամական հեղափոխության ժամանակ, իրանցիներին կոչ է արել «դուրս գալ փողոց և միացյալ ճակատով աղաղակել իրենց պահանջների մասին»։ X-ում գրառման մեջ Փահլավին նշել է, որ միլիոնավոր իրանցիներ պահանջում են իրենց ազատությունը։

Փահլավին նաև շնորհակալություն է հայտնել ԱՄՆ նախագահ Դոնալդ Թրամփին, որը «պատասխանատվության է ենթարկում ռեժիմին», և եվրոպացի առաջնորդներին կոչ է արել անել նույնը։

Իրանի իշխանությունները հայտարարել են, որ ջանք չեն խնայում օրենքի շրջանակներում ցուցարարների օրինական պահանջները բավարարելու համար։