Փաստաբանը հաղորդում է ներկայացրել պատգամավոր Աշոտ Սիմոնյանի նկատմամբ ուժ կիրառելով բերման ենթարկելու դեպքով
Փաստաբան Արամ Վարդևանյանը հաղորդում է ներկայացրել գլխավոր դատախազին Ազգային ժողովի «Հայաստան» խմբակցության պատգամավոր Աշոտ Սիմոնյանին ոստիկանների կողմից բերման ենթարկելու դեպքով։
Վարդևանյանն այս մասին գրել է «Ֆեյսբուք»-ի իր էջում։
«Որպեսզի հարց չհնչի արդյոք հաղորդում ներկայացվե՞լ է Աշոտ Սիմոնյանի նկատմամբ դեպքի առթիվ, թե՞ ոչ, հստակ պատասխանում եմ՝ հաղորդումը ներկայացրել եմ անձամբ: Հաղորդումը ներկայացրել եմ Գլխավոր դատախազին»,- գրել է Վարդևանյանը՝ հավելելով, որ հաղորդման մեջ ներկայացրել է նաև ոստիկանների ինքնության վերաբերյալ տեղեկություն։
Ավելի վաղ, ՆԳՆ հանրային հաղորդակցության և իրազեկման վարչությունը տեղեկացրել էր, որ Ազգային ժողովի «Հայաստան» խմբակցության պատգամավոր Աշոտ Սիմոնյանին բերման ենթարկելու դեպքի առթիվ ծառայողական քննություն է նշանակվել։
Համացանցում տեսանյութ է տարածվել, որտեղ երևում է, թե ինչպես են ՀՅԴ Հայաստանի Գերագույն մարմնի շենքի առջև ոստիկանության ծառայողները բերման ենթարկում ԱԺ պատգամավոր Աշոտ Սիմոնյանին։
