Վիետնամում Հայաստանի դեսպանն իր հավատարմագրերն է հանձնել երկրի նախագահի պաշտոնակատարին
![](https://168.am/wp-content/uploads/2024/05/1137219.jpg)
Վիետնամի Սոցիալիստական Հանրապետությունում Հայաստանի Հանրապետության դեսպան Սուրեն Բաղդասարյանը իր հավատարմագրերն է հանձնել Վիետնամի նախագահի պաշտոնակատար, փոխնախագահ Վո Թի Ան Սուանին: Այս մասին հաղորդագրություն է տարածել ՀՀ արտաքին գործերի նախարարությունը։
Արարողությանը հաջորդած հանդիպման ընթացքում զրուցակիցները քննարկել են քաղաքական երկխոսության բարձր մակարդակի ապահովման, տնտեսական համագործակցության աշխուժացման, կրթության և գիտության ոլորտներում փոխգործակցության կարևորությունը:
Զրուցակիցներն անդրադարձել են նաև միջազգային կազմակերպությունների շրջանակներում փոխադարձ աջակցության հիման վրա համագործակցության հարցին։
Հանդիպման ավարտին նախագահի պաշտոնակատար Վո Թի Ան Սուանը դեսպան Բաղդասարյանին հաջողություններ է մաղթել իր պաշտոնավարման ընթացքում և ընդգծել Վիետնամի կառավարության աջակցության պատրաստակամությունը։