Խուլիգանություն, կրակոցներ ու մարմնական վնասվածքներ՝ Հրազդանում
Սեպտեմբերի 17-ին, ժամը 22.22-ին, ոստիկանության Կոտայքի մարզի օպերատիվ կառավարման կենտրոն զանգած կինը հայտնեց, որ Հրազդանի Կենտրոն թաղամասի մի բակում մոտ 15-20 տղաների մասնակցությամբ կռիվ է եղել, նույնիսկ կրակել են իրար վրա ու ավտոմեքենաներով հեռացել: Քիչ անց ստացվեց նաև հիվանդանոցային ահազանգ. բազմակի սալջարդներով բուժօգնության են տեղափոխվել նույն թաղամասի բնակիչ հայր ու որդի:
Հաղորդումը փոխանցվել է ոստիկանության Հրազդանի բաժին: Մեկնել է բաժնի օպերատիվ խումբը, նաև Մարզային վարչության ղեկավարներ ու պարեկներ:
Ձեռնարկված օպերատիվ-հետախուզական միջոցառումների շնորհիվ Հրազդանի բաժնի ծառայողների ստացած տեղեկություններն իրացվել են Կոտայքի մարզային վարչության, Կոտայքի, Նաիրիի և Չարենցավանի բաժինների ծառայողների հետ համատեղ: Պարզվել է, որ նույն օրը, ժամը 22-ի սահմաններում, Կենտրոն թաղամասի շենքի բակում «ՎԱԶ-21214» մեքենայի 34-ամյա վարորդն ու նրա 37 և 36 տարեկան ընկերները, երեքն էլ՝ նույն թաղամասի բնակիչ, վիճաբանել են հոր և որդու հետ, ծեծի են ենթարկել նրանց, իսկ 37-ամյա տղամարդը իր մոտ եղած ատրճանակից կրակոցներ է արձակել գետնին:
Նախաձեռնվել է քրեական վարույթ` խուլիգանության հատկանիշներով:
Նոյեմբերյանի բաժնի ծառայողների հետ համատեղ ձեռնարկած օպերատիվ-հետախուզական միջոցառումների և որոնողական աշխատանքի շնորհիվ, սեպտեմբերի 18-ին, ժամը 3.18-ին, «Բագրատաշեն» սահմանային անցակետում հայտնաբերվել, հանցանք կատարած լինելու անմիջականորեն ծագած հիմնավոր կասկածանքով ձերբակալվել ու Կոտայքի մարզային քննչական վարչություն են տեղափոխվել վարորդն ու կրակող ընկերը: Երկուսն էլ տեղափոխվել են Հրազդանի բաժնի ձերբակալվածների պահման վայր:
Ձեռնարկվում են միջոցներ՝ նրանց ընկերոջը հայտնաբերելու ուղղությամբ:
Նախաքննությամբ հանգամանքները պարզվում են:
