Բաքուն դեռ հույս ունի, որ խաղաղության պայմանագիրը կստորագրվի մինչև տարեվերջ․ Հաջիև
Ադրբեջանի նախագահի օգնական Հիքմեթ Հաջիևը ՏԱՍՍ գործակալության հետ զրույցում հայտնել է, որ պաշտոնական Բաքուն դեռ հույս ունի մինչև տարեվերջ խաղաղության պայմանագրի ստորագրել Երևանի հետ։
Պատասխանելով հարցին, թե որ փուլում են այժմ գտնվում հայ-ադրբեջնական խաղաղության պայմանագրի հետ կապված գործընթացները, Ադրբեջանի նախագահի օգնականը նշել է․
«Այս պահին խաղաղության հաստատման գործընթացը կանգ է առել Հայաստանի քաղաքական ղեկավարության ոչ կառուցողական և ոչ անկեղծ դիրքորոշման պատճառով»։
Հաջիևը կոչ է արել «հայկական ղեկավարությանն անել գլխավոր քայլը՝ խաղաղության պայմանագրի տակ ստորագրությամբ պաշտոնապես արձանագրել Ադրբեջանի տարածքային ամբողջականության ճանաչումը, ներառյալ մեր երկրի Ղարաբաղյան տնտեսական շրջանը, և պարտավորվել ապագայում ձեռնպահ մնալ մեր երկրի ներքին գործերին միջամտությունից, այդ թվում՝ մեր ներքին հարցերից, ինչպիսին «Ղարաբաղում էթնիկ հայկական ծագմամբ մեր հայրենակիցների» հետ մեր փոխգործողությունն է, բնակչության այդ խմբի իրավունքների և անվտանգության ապահովման պատրվակով միջազգային հարթակներ դուրս բերելուց»:
«Նրանք մեր քաղաքացիներն են, և նրանց իրավունքներն ու պարտավորությունները կապահովվեն Ադրբեջանի Սահմանադրությամբ: Կարևոր է, որ Հայաստանը հրաժարվի մեր երկրում անջատողականությունը ֆինանսավորելու և բորբոքելու քաղաքականությունից», – նշել է պաշտոնյան:
