Պուտինն ընդունել է Կիմ Չին Ընի հրավերը՝ այցելելու Հյուսիսային Կորեա
Հյուսիսային Կորեայի ղեկավար Կիմ Չեն Ընը Վլադիվոստոկ այցի ընթացքում Ռուսաստանի նախագահ Վլադիմիր Պուտինին հրավիրել է իր երկիր։ Պուտինն ընդունել է հրավերը։ Այս մասին հայտնել է ՌԴ նախագահի մամուլի քարտուղար Դմիտրի Պեսկովը։
«Առանձնազրույցի ընթացքում Կիմ Չեն Ընը Պուտինին հրավիրել է այցելել Հյուսիսային Կորեա։ Պուտինը երախտագիտությամբ է ընդունել այս հրավերը։ Բոլոր պայմանավորվածությունները կշարունակվեն դիվանագիտական խողովակներով», – Պեսկովի խոսքերն է մեջբերում РБК պարբերականը։
Պեսկովին նաև հարց են տվել կողմերի միջև ռազմատեխնիկական համագործակցության վերաբերյալ։
«Ռազմատեխնիկական համագործակցությունը պատկանում է փոխգործակցության բավականին զգայուն ոլորտների կատեգորիային։ Եվս մեկ անգամ կրկնում եմ՝ Հյուսիսային Կորեան մեր հարևանն է, և մենք մտադիր ենք զարգացնել հարաբերությունները բոլոր հնարավոր ոլորտներում, ինչն էլ կանենք», – ասել է ՌԴ նախագահի մամուլի քարտուղարը։
Պեսկովը երկու առաջնորդների հանդիպումն անվանել է «շատ և շատ կառուցողական»։ Նրա խոսքով՝ կողմերը պայմանավորվել են շարունակել շփումները։ Մասնավորապես, հոկտեմբերին նախատեսվում է ՌԴ արտգործնախարար Սերգեյ Լավրովի այցը Փհենյան։ Հուլիսին Հյուսիսային Կորեա էր մեկնել ՌԴ պաշտպանության նախարար Սերգեյ Շոյգուն։
