Ոչ թե Հնդկաստան, այլ` Բհարատ. երկրի նոր անվանումը` սկանդալի պատճառ
Հնդկաստանի վարչապետ Նարենդրա Մոդին Նյու Դելիում բացված G20 գագաթնաժողովի լիագումար նիստում ելույթ է ունեցել ամբիոնի վրա ոչ թե «Հնդկաստան», այլ՝ «Բհարատ» ցուցանակով։
Երկու բառերն էլ հանրապետության պաշտոնական անուններն են, բայց առաջինն օգտագործվում է ներքին լսարանի համար, իսկ երկրորդը՝ անգլերենում և միջազգային լսարանի համար:
Գագաթնաժողովի նախօրեին երկրի անվան հարցը կրկին դարձել է քաղաքական վեճերի առարկա։ Հանրապետական նախագահ Դրաուպադի Մուրմուն G20 ընթրիքի հրավերներ է ուղարկել՝ իր պաշտոնը «Հնդկաստանի նախագահի» փոխարեն նշելով որպես «Բհարատի նախագահ»։
Ընդդիմությունը մեղադրել է Մոդիի կառավարությանը «Հնդկաստան» անվանումն անտեսելու և հնդկական տարբերակը թողնելու մտադրության համար։
Ներքաղաքական բանավեճը գրավել է համաշխարհային լրատվամիջոցների ուշադրությունը, իսկ ինքը՝ Մոդին, նույնիսկ խորհուրդ է տվել կաբինետի նախարարներին խուսափել այս թեմայի քննարկումից և մեկնաբանություններից՝ քաղաքական սկանդալից խուսափելու համար, հաղորդում է PTI-ն։
Միևնույն ժամանակ, մի շարք տեղական հրատարակություններ՝ վկայակոչելով աղբյուրներ, հայտնում են, որ միջազգային հարթակներում Հնդկաստանի պաշտոնական անվանման հարցը կարող է քննարկվել երկրի խորհրդարանի արտահերթ նիստի ժամանակ, որը նշանակված է սեպտեմբերի 18-21-ը։
