Ադրբեջանի ագրեսիայի հետևանքով վիրավորված զինծառայող Նարեկ Պողոսյանի վիրահատությունը հաջող է անցել
Ադրբեջանական սադրանքի հետևանքով վիրավորում ստացած զինծառայող Նարեկ Պողոսյանը ենթարկվել է վիրահատական բարդ միջամտության, այն անցել է հաջող, սակայն վիճակը դեռևս գնահատվում է ծայրահեղ ծանր։ Այս մասին «Լուրեր»-ի հետ զրույցում տեղեկացրել է ՀՀ ՊՆ խոսնակ Արամ Թորոսյանը:
Ըստ Թորոսյանի՝ Ադրբեջանի սադրանքի հետևանքով վիրավորված մյուս զինծառայողի վիճակը գնահատվում է միջին ծանրության, այս պահին կյանքին վտանգ չի սպառնում: Երկու վիրավորներն էլ զինվորական հոսպիտալի բուժանձնակազմի հսկողության տակ են:
Ադրբեջանը սեպտեմբերի 1-ի վաղ առավոտից ինտենսիվ կրակ է վարել Սոթքի, ավելի ուշ նաև Նորաբակի հատվածում տեղակայված հայկական դիրքերի ուղղությամբ՝ կիրառելով հրաձգային զինատեսակներ, ականանետ, ԱԹՍ։ Ադրբեջանական ագրեսիայի հետևանքով հայկական կողմը հայտարարել է 3 զոհի և 2 վիրավորի մասին։
