Սպիտակ տան մոտ ոստիկաններից փախչող մեքենայի հարվածից 1 մարդ է մահացել. վարորդը փախուստի մեջ է
ԱՄՆ-ում՝ Սպիտակ տան մերձակայքում, 1 մարդ է մահացել ոստիկանության կողմից վարորդի հետապնդման ընթացքում։ Միջադեպը տեղի է ունեցել հուլիսի 12-ի երեկոյան՝ Վաշինգտոնում, այն բանից հետո, երբ ոստիկանության սպաները կանգնեցրել են ժամկետանց հաշվառման համարանիշով մեքենան։
Ըստ ԱՄՆ գաղտնի ծառայության՝ վարորդը չի կանգնեցրել մեքենան, այլ անցել է կարմիր լույսի տակով, հարվածել հետիոտնային անցման վրա գտնվող մի քանի անցորդների, որոնցից մեկը՝ 75-ամյա մի տղամարդ, մահացել է։ Մեկ 13-ամյա աղջիկ էլ վնասվածքներ է ստացել․ նրան բուժօգնություն է ցուցաբերվել տեղում։
Կասկածյալը դեռ փախուստի մեջ է։ Գաղտնի ծառայությունների խոսնակը հայտնել է, որ ոստիկանությունն աշխատում է կասկածյալին գտնելու ուղղությամբ։
