Իսլանդիայում հարյուրավոր երկրաշարժերից հետո հրաբուխ է ժայթքել
Իսլանդիայի մայրաքաղաք Ռեյկյավիկից հարավ ժայթքել է Լիտլի Հրուտուր հրաբուխը, որը ծխի հսկայական ամպեր է տարածել ամբողջ տարածաշրջանում։ Իսլանդիայի օդերևութաբանական ծառայությունը հրաբխի ժայթքումն անվանել է «փոքր»։ Այս մասին հաղորդում է CNN-ը։
Լեռան վրա 200 մետր երկարությամբ ճեղքվածք է առաջացել, որից լավան դուրս է հոսում մի քանի շատրվանների տեսքով։
Գիտնականները նախազգուշացրել էին հրաբխի հնարավոր ժայթքման մասին այն բանից հետո, երբ վերջին շաբաթներին հարյուրավոր թեթև երկրաշարժեր էին գրանցվել։
Քանի որ ժայթքումը տեղի է ունեցել չբնակեցված հատվածում, համայնքներին և ենթակառուցվածքներին անմիջական վնաս չի սպառնում։ Այդուհանդերձ, Իսլանդիայի օդերևութաբանական ծառայությունը մարդկանց նախազգուշացրել է չմոտենալ տվյալ հատվածին՝ հրաբխային գազերի վտանգավոր բարձր մակարդակի պատճառով։
Ծառայությունից ընդգծել են, որ քամին այդ գազերի որոշ մասը կքշի-կտանի բնակեցված հատվածներ, այդ թվում՝ երկրի մայրաքաղաք։
