Ուկրաինան գիտի, որ պատերազմի ժամանակ ՆԱՏՕ-ին անդամակցումն ընդհանրապես հնարավոր չէ. Շոլց
Գերմանիայի կանցլեր Օլաֆ Շոլցը հայտարարել է, որ Ուկրաինան չի կարողանա դառնալ ՆԱՏՕ-ի անդամ, քանի դեռ իր տարածքում հակամարտություն է։
«Մի բան բացարձակապես պարզ է, և Ուկրաինան դա գիտի և բազմիցս ասվել է՝ պատերազմի ժամանակ մեր դաշինք մտնել ընդհանրապես հնարավոր չէ։ Անդամակցության պայմանը սահմանային չլուծված հակամարտությունների բացակայությունն է»,- ասել է կանցլերը ARD հեռուստաընկերությանը տված հարցազրույցում։
Միաժամանակ Շոլցը նշել է, որ Գերմանիան այն երկրներից է, որոնք իրենց պարտավոր են համարում Ուկրաինայի համար անվտանգության երաշխիքներ մշակել հակամարտության ավարտից հետո։
«Եվ այս հարցում մենք շատ ակտիվ բանակցություններ ենք վարում Ուկրաինայի հետ՝ գրեթե պատերազմի սկզբից»,- ասել է նա՝ նշելով, որ դրանց մասնակցում են նաև Գերմանիայի այլ մերձավոր դաշնակիցներ, և ոչ միայն ԱՄՆ-ն։
Հիշեցնենք, որ Ուկրաինայի ԱԳՆ ղեկավար Դմիտրի Կուլեբան Գերմանիայի կառավարությանը հորդորել էր չհակազդել ՆԱՏՕ-ին իր երկրի անդամակցությանը, ինչը, ըստ նրա, ժամանակին արել է նախկին կանցլեր Անգելա Մերկելը։
«Իմ ուղերձը պարզ է. մի՛ կրկնեք այն սխալը, որը կանցլեր Մերկելը թույլ տվեց 2008 թվականին Բուխարեստում, երբ նա դեմ էր ՆԱՏՕ-ին Ուկրաինայի անդամակցության հարցում որևէ առաջընթացի», – Welt am Sonntag թերթին ասել էր Կուլեբան:
Նրա խոսքով՝ Մերկելի գործողությունները, մասնավորապես, նպաստել են Ղրիմի միավորմանը Ռուսաստանին։
Ուկրաինացի նախարարի խոսքով՝ ՆԱՏՕ-ի ղեկավարների սխալն այն է, որ նրանք դաշինքին Ուկրաինայի անդամակցությունը համարում են «նոր պատերազմի ուղի»։
Հուլիսի 11-12-ը Վիլնյուսում կայանալիք ՆԱՏՕ-ի գագաթնաժողովի նախօրեին Կիևն ակտիվացրել է ջանքերը՝ կապված դաշինքին միանալու հավակնությունների հետ։ Ուկրաինայի նախագահի աշխատակազմի ղեկավար Անդրեյ Երմակը հայտնել է, որ Կիևն ակնկալում է այս գագաթնաժողովում պարզեցված ընթացակարգով կազմակերպությանն անդամակցելու հրավեր ստանալ։ Միևնույն ժամանակ ՆԱՏՕ-ի գլխավոր քարտուղար Ենս Ստոլտենբերգն ավելի վաղ հայտարարել էր, որ ռազմական գործողությունների ժամանակ Ուկրաինայի անդամակցությունը դաշինքին անհնար է, և անդամ երկրները և Կիևը դա հասկանում են։
