ԱՄՆ-ի օգնությունը Լաչինի միջանցքի շրջափակման պատճառով չի հասնում Լեռնային Ղարաբաղ. ԱՄՆ ՄԶԳ-ի ղեկավար
ԱՄՆ Միջազգային զարգացման գործակալության (ՄԶԳ) ղեկավար Սամանթա Փաուերը Ներկայացուցիչների պալատի Արտաքին հարաբերությունների հանձնաժողովի լսումների ժամանակ հայտարարել է, որ ամերիկյան օգնության ուղարկումն Արցախ հնարավոր չէ Լաչինի միջանցքի շրջափակման պատճառով:
Կոնգրեսական Քրիս Սմիթը հարց է բարձրացրել՝ արդյոք ամերիկյան որևէ օգնություն հասնում է Լեռնային Ղարաբաղ, որտեղ 120 հազար մարդիկ շարունակում են շրջափակման ենթարկվել Ադրբեջանի կողմից:
«Լեռնային Ղարաբաղի առնչությամբ… ինչպես հասկանում եմ, Կարմիր խաչի միջազգային կոմիտեի ավտոշարասյունն այսօր (մայիսի 17-ին), ըստ էության, մտել է այնտեղ, սակայն մուտքը չափազանց սահմանափակված է: Հիմնական սննդամթերքի շատ տեսակների պակաս կա», – ասել է Փաուերը:
Նա հավելել է, որ սննդամթերքը պետք է տարածաշրջան հասնի առևտրային ուղիներով, սակայն ճանապարհի արգելափակման և անցակետերի տեղադրման պատճառով դա հնարավոր չէ, հետևաբար, հնարավորության դեպքում օգնությունը տեղ են հասցնում ռուսական խաղաղապահ զորակազմը և ԿԽՄԿ-ն: Սամանթա Փաուերը նաև հավելել է, որ ԱՄՆ-ն երկու առաքելություն է ուղարկել Արցախ՝ իրավիճակը գնահատելու համար:
Իր հերթին կոնգրեսական Բրեդ Շերմանը հարց է բարձրացրել այն մասին՝ արդյոք Արցախի շրջափակումը ԱՄՆ ՄԶԳ-ի կողմից կարող է որակվել որպես ճգնաժամ, և ինչ կարող է անել ԱՄՆ ՄԶԳ-ն՝ Արցախի ժողովրդին օգնելու համար:
Դարձյալ հիշեցնելով, որ մայիսի 17-ին՝ լսումներից առաջ, ԿԽՄԿ-ի ավտոշարասյունը կարողացել է մտնել Լեռնային Ղարաբաղ, Փաուերը նաև շեշտել է, որ Լեռնային Ղարաբաղը չպետք է ստիպված լինի հույսը դնել հումանիտար շարասյուների վրա, ուստի ճանապարհի բացումը հրամայական է:
