ԱԺ պատվիրակությունը կմեկնի Թուրքիա. իշխող խմբակցության պատգամավորները ընդդիմադիր գործընկերոջը կոչ են անում միանալ իրենց
ՀՀ ազգային ժողովի պատվիրակությունը կմեկնի Թուրքիա՝ մասնակցելու Սևծովյան տնտեսական համագործակցության խորհրդարանական վեհաժողովի աշխատանքներին:
ԱԺ նիստում Բաբկեն Թունյանը, անդրադառնալով «Հայաստան» խմբակցությունից Գեղամ Մանուկյանի հարցին, թե ինչո՞ւ է ԱԺ փոխնախագահ Ռուբեն Ռուբինյանը մասնակցում Վաշինգտոնում ընթացող բանակցություններին, ասաց. «Վաղը չէ մյուս օրը մենք Սևծովյան պատվիրակության անդամներով մեկնում ենք Թուրքիա, Անկարա, որտեղ բավականին բարդ օրակարգ է մեզ սպասվում: Եվ այդ պատվիրակության անդամ եք նաև Դուք: Դուք հարցնում եք, թե Ռուբեն Ռուբինյանն ինչո՞ւ է գնում, ես էլ ասում եմ՝ Դուք ինչո՞ւ չեք գալիս: Շատ լավ ամբիոն էր, գայիք, Ձեր բոլոր մտահոգությունների մասին բարձրաձայնեիք, լիքը խնդիրներ կան, օգնեիք, որ մենք մեր տեսակետը տանեինք առաջ: Սա ուղիղ վերաբերում է Ձեր պարտականություններին»:
Թունյանը նշեց՝ Սևծովյան տնտեսական համագործակցության կազմակերպությունը շատ բարդ կազմակերպություն է՝ շատ բարդ օրակարգով, և լիքը լուծելու հարց կա:
«Քաղաքացիական պայմանագիր» խմբակցության պատգամավոր Գևորգ Պապոյանն էլ կոչ արեց Գեղամ Մանուկյանին միանալ իրենց ու գնալ Թուրքիա:
«Եվ այն, ինչ պարոն Մանուկյանն ասել է տարբեր հարթակներում հայ-թուրքական հարաբերությունների, Թուրքիայի, Ադրբեջանի վերաբերյալ, ինչ մտածում եք՝ եկեք այնտեղ ասեք»,- նշեց Պապոյանը:
