Չինաստանը Հայաստանի կտրամադրի 100 մլն յուանի չափով օգնություն. համաձայնագիրը ներկայացվեց ԱԺ-ին
ՀՀ ազգային ժողովը քննարկեց «Հայաստանի Հանրապետության Կառավարության եւ Չինաստանի Ժողովրդական Հանրապետության Կառավարության միջեւ` տեխնիկատնտեսական համագործակցության մասին» համաձայնագիրը: Համաձայնագիրը վավերացնելու մասին նախագիծն ԱԺ նիստում ներկայացրեց ՀՀ արտաքին գործերի փոխնախարար Մնացական Սաֆարյանը:
«Այս համաձայնագրով Չինաստանի կողմից Հայաստանին տրամադրվում է 100 մլն չինական յուանի չափով անհատույց օգնություն՝ Հայաստանի Հանրային հեռուստատեսության համար հեռարձակման դահլիճի նախագծի, այդ թվում` փոխհամաձայնեցված այլ նախագծերի քննարկման և իրականացման համար»,-ասաց Սաֆարյանը:
Հայաստանի և Չինաստանի միջև ստորագրվել են 5 տասնյակից ավելի համաձայնագրեր, արձանագրություններ, հուշագրեր: Ակտիվ համագործակցություն է ընթանում նաև միջազգային կազմակերպությունների շրջանակում:
Ֆինանսների նախարարությունը հայտնել է, որ համաձայնագրում առկա են ՀՀ-ի համար ֆինանսական պարտավորություններ նախատեսող դրույթ, մասնավորապես համաձայնագիրը կարող է հանգեցնել պետբյուջեի ծախսերի ավելացման՝ պարտադիր ծախսերի մասով և եկամուտների նվազեցման՝ հարկային և մաքսային արտոնությունների մասով: ԱԳՆ-ն նպատակահարմար է համարում ստորագրված համաձայնագրի վավերացումն ԱԺ-ի կողմից:
