ՀՀ դեսպանն իսպանացի խորհրդարանականներին է ներկայացրել Լաչինի միջանցքի արգելափակման հետևանքով ստեղծված իրավիճակը
Իսպանիայում Հայաստանի դեսպան Սոս Ավետիսյանը հանդիպել է Իսպանիայի խորհրդարանի ԵՄ հարցերով հանձնաժողովի նախագահ Սուսանա Սումելսո Խորդանի և հանձնաժողովի անդամների հետ։ Հանձնաժողովի կազմում ընդգրկված են խորհրդարանականներ Իսպանիայի Սենատից և Պատգամավորների Կոնգրեսից։
Ինչպես տեղեկացանք Իսպանիայում ՀՀ դեսպանության «Ֆեյսբուք»-ի էջից, դեսպանն իսպանացի խորհրդարանականներին է ներկայացրել տարածաշրջանային վերջին զարգացումները, Ադրբեջանի կողմից Լաչինի միջանցքի ավելի քան 70 օր շարունակվող արգելափակման հետևանքով ստեղծված իրավիճակը, Լաչինի միջանցքի բնականոն գործունեությունն օր առաջ վերականգնելու անհրաժեշտությունը։
Ըստ աղբյուրի՝ հանդիպման ընթացքում զրուցակիցներն անդրադարձել են երկկողմ հարաբերությունների օրակարգին առնչվող մի շարք հարցերի, կարևորել են խորհրդարանական դիվանագիտության ամրապնդումը, մտքեր են փոխանակել աշխարհաքաղաքական զարգացումների շուրջ։ Դեսպան Ավետիսյանը պատասխանել է իսպանացի խոհրդարանականներին հետաքրքրող հարցերին։
