Զանգվածային հրաձգություն ԱՄՆ-ում. կա 3 զոհ, 5 վիրավոր
Միչիգանի համալսարանում զանգվածային հրաձգության հետևանքով առնվազն 3 մարդ է մահացել, ևս 5 մարդ վիրավորվել է:
Դեպքը տեղի է ունեցել երկուշաբթի երեկոյան Միչիգանի պետական համալսարանի տարածքում: Փոխոստիկանապետի պաշտոնակատար Քրիս Ռոզմանը հայտնել է, որ տուժածներից մի քանիսը կյանքին սպառնացող վիրավորում են ստացել: Ըստ Ռոզմանի՝ ոստիկանությունը երկուշաբթի ժամը 20:18-ին (Երևանի ժամանակով երեքշաբթի 06:18) նախ հաղորդում է ստացել համալսարանի Բերքի Հոլ մասնաշենքի մոտ հրաձգության մասին, այնուհետև հաղորդվել է, որ կրակոցներ են լսվել մոտակա մեկ այլ շենքում:
Հրաձգությունն իրականացրել է կարճահասակ սևամորթ մի տղամարդ, որի հագին դիմակ և գլխարկ է եղել: Ոստիկանությունը տարածել է նրա լուսանկարները:
Հրաձգությունն իրականացնող տղամարդը փախուստի է դիմել, սակայն ավելի ուշ նա մահացել է ինքն իրեն հասցրած հրազենային վնասվածքից: Կասկածյալի ինքնությունն առայժմ հայտնի չէ:
