Երևանում մոտ 3 հազար 800 վերելակ ենթակա է փոխելու. քաղաքապետ
Երևանի քաղաքապետ Հայկ Մարությանն ուշադրության կենտրոնում է պահում մայրաքաղաքի բարձրահարկ շենքերի վերելակների խնդիրը: «Ազատություն» ռադիոկայանի հետ զրույցում Հայկ Մարությանը նշեց, որ խնդրին շատ լավ ծանոթ է, իրավիճակը պատկերացնում է:
«Վերելակներով վեր ու վար արել եմ, խնդրին ծանոթ եմ, դրան լուծում կտրվի, ինչպես մենք խոստացել ենք: Մոտ 3 հազար 800 վերելակ պետք է ընդհանրապես փոխվի: Դա կարվի մոտ 2-3 տարվա ընթացքում, ներկայում գույքագրում ենք աշխատանքը, հասկանալու համար, թե ինչ ծավալների հետ գործ ունենք»,-ասաց Հայկ Մարությանը:
Քաղաքապետը նշեց, որ ՀՀ ԱԻՆ-ը տարին մեկ անգամ փորձաքննություն է իրականացնում և միայն դրական կարծիքի դեպքում թույլ են տալիս, որ այդ վերելակը գործարկվի:
Պատասխանելով հարցին, թե պաշտոնավարման ընթացքում Երևանի քաղաքապետն իր նախընտրական որ խոստումն է կատարել, Հայկ Մարությանը նշեց, որ բոլոր կետերով աշխատանքների մեկնարկը տրված են: Որոշ ուղղություններով ավելի շատ աշխատանք է կատարվել:
