«Հաշվեքննիչ պալատն ու Վերահսկողական ծառայությունը պետք է արձանագրեն որպես խախտում». Գևորգ Պետրոսյանը՝ արզպետների կողմից իրենց իսկ պարգևատրումների մասին
Այսօր ԱԺ ճեպազրույցների ժամանակ ԲՀԿ խմբակցության պատգամավոր Գևորգ Պետրոսյանը, անդրադառնալով մարզպետների կողմից իրենց իսկ պարգևատրումների խնդրին, հայտարարեց, որ դա Հաշվեքննիչ պալատի ու Վերահսկողաական ծառայության իրավասության ներքո է:
Ըստ նրա՝ կա անմեղության կանխավարկածի սկզբունք, որը պետք է պահպանվի, և նախ պետք է խախտում հայտնաբերվի, արդյոք մարզպետն իրավունք ունե՞ր իրեն պարգևատրելու, թե՞ ոչ:
«Պետք չի ավելորդ շտապողականություն դրսևորենք ու յուրացում կամ այլ բան բնորոշենք, այսինքն՝ պետք է պահպանենք իշխանության տարանջատման սկզբունքը: Ընդհանրապես, պարգևատրումը, ՀՀ գործող աշխատանքային օրենսգրքի համաձայն, կատարվում են տարեկան արդյունքների հիման վրա, և քանի որ այդ մարզպետների գործունեության մեկ տարին չի լրացել, կասկածելի է պարգևատրումների հիմքը: Հաշվեքննիչ պալատն ու Վերահսկողական ծառայությունը պետք է արձանագրեն որպես խախտում, այդ դեպքում դա դուրս չի մնա ԲՀԿ ուշադրության կենտրոնից»,- ասաց Գ.Պետրոսյանը:
