Մետաղական հանքարդյունաբերությունը կարգելվի՞
Ջերմուկ համայնքի պաշտոնական կայքից տեղեկանում ենք, որ ավագանին հավանություն է տվել Ջերմուկ համայնքի բնակիչների՝ 2018 թվականի դեկտեմբերի 5-ին համայնքի ավագանուն ներկայացրած «Ջերմուկ համայնքը էկո-տնտեսական տարածք դարձնելու և համայնքում մետաղական հանքարդյունաբերությունը արգելելու վերաբերյալ» կոլեկտիվ հանրագրում նշված առաջարկությանը:
168.am-ը փորձեց պարզել, թե դա ի՞նչ է ենթադրում, արդյո՞ք տարածվում է նաև Ամուլսարի հանքի վրա։
Աշխատակազմի քարտուղար Գոհար Թադևոսյանը 168.am-ի հետ զրույցում պարզաբանեց, որ ընդամենը հանրագրում նշված առաջարկությանը հավանություն է տրվել, և դա որևէ կոնկրետ քայլ չի ենթադրում.
«Չէր էլ կարող ենթադրել, որովհետև ՏԻՄ օրենքով այդ որոշումն արգելելու և թույլ տալու գործառույթ ավագանուն վերապահված չէ»։
Հարցին՝ եթե առաջարկությունն ընդունվել է, հաջորդ քայլը ո՞րն է լինելու, նա պատասխանեց.
«Հաջորդ քայլն է՝ սպասել կառավարության որոշմանը։ Տվյալ հարցի հետ կապված որոշում կայացնողը կառավարությունն է, իրենք են հասցեատերը, ոչ թե համայնքի ավագանին։ Համայնքի ավագանուն օրենքը թույլ է տալիս միայն հավանություն տալ առաջարկությանը։ Սա որևէ քայլ չի ենթադրում, որովհետև, նորից եմ կրկնում, սա ավագանու որոշումների տիրույթի հարց չէ»։
