Վրաստանն Ադրբեջանից պահանջել է Մուխտարլըի գործի մանրամասները
Վրաստանը Ադրբեջանի օրինապահ մարմիններից պահանջել է Վրաստանում առևանգված և Ադրբեջան տեղափոխված մարդու իրավունքների պաշտպան, լրագրող Աֆղան Մուխտարլըի նկատմամբ հարուցված քրեական գործի մանրամասները: Այս մասին հայտնում է ադրբեջանական azadliq.org-ը:
Ադրբեջանական ԶԼՄ-ների հաղորդած տվյալներով` հունիսի 27-ին Վրաստանի գլխավոր դատախազ Իրակլի Շոթաձեն տեղական լրատվամիջոցներին հայտնել է, որ սպասում են Ադրբեջանի օրինապահ մարմինների պատասխանին:
«Մենք դիմել ենք այդ երկրի օրինապահ մարմիններին և սպասում ենք նրանց պատասխանին»,- ասել է գլխավոր դատախազը:
Դատախազի փոխանցմամբ` վրացական կողմն անհրաժեշտ մանրամասներն ու փաստաթղթերը ստանալուց հետո կընդունի համապատասխան իրավական որոշումներ և քայլեր կձեռնարկի:
