«Մենք կստեղծենք պատմություն նորից» («We will make history again). Աբրահամ Խաշմանյան

Չեմպիոնների լիգայի որակավորման առաջին փուլում Հայաստանի առաջնության չեմպիոն «Ալաշկերտը» կհանդիպի Անդորրայի չեմպիոն «Սանտա-Կոլոմային»:

Սպասվելիք խաղի մասին է խոսել հայկական թիմի գլխավոր մարզիչ Աբրահամ Խաշմանյանը:

Ավելի վաղ Աբրահամ Խաշմանյանը նշել էր, որ թիմը անելու է ամեն բան հաղթանակ տոնելու համար:

«Ի տարբերություն մյուս թիմերի, այս մրցակցին մենք ճանաչում ենք: Մնացածը ցույց կտան առաջիկա խաղերը: Գիտենք, թե «Սանտա-Կոլոման» ինչ թիմ է, ինչ է անում խաղադաշտում`թե ֆուտբոլային, թե հակաֆուտբոլային տեսանկյունից: Նախորդ դիմակայությունից արդեն մեկ տարի է անցել` միգուցե շատ բան է փոխվել: Ամեն դեպքում, պետք է ամեն ինչ անենք, որպեսզի հաղթահարենք առաջին փուլի արգելքը: Կարծում եմ՝ լավ է, որ առաջին հանդիպումը կանցկացնենք սեփական հարկի տակ:

ԲԱՏԷ-ի մասին կսկսենք մտածել միայն «Սանտա-Կոլոմայից» հետո: Ամեն դեպքում, այստեղ պատրաստվում եմ դիտել ԲԱՏԷ-ի մասնակցությամբ հանդիպում:

Կկարողանանք կարծիք կազմել նաև այս թիմի մասին: Սակայն մենք կենտրոնանում ենք «Սանտա-Կոլոմայի» հետ դիմակայության վրա»:

Աբրահամ Խոշմանյանը վերհիշել է այս թիմի հետ նախորդ խաղերը և տեղի ունեցած միջադեպերը: Ըստ Խաշմանյանի՝ պետք չէ կենտրոնոնալ այդ միջադեպերի վրա և լարվածություն ստեղծել:

Աբրահամ Խաշմանյանը նշում է, որ շատ լավ են ճանաչում մրցակցին, և, կարելի է ասել, որ խաղալու են Անդորրայի հավաքականի դեմ: Հայաստանի չեմպիոնը ուսումանսիրել է մրցակցի խաղը և արդեն իսկ ճանաչում է թիմի նոր ֆուտբոլիստներին:

Խաշմանյանը նշում է, որ թիմը պատրաստ է հանդիպմանը:

«Չէի ասի, որ մարզավիճակի գագաթնակետին ենք, քանի որ դրա համար կա պատճառ: Առաջնությունից հետո թիմը արձակուրդում էր: Թիմը լավ մարզավիճակում է լինում, երբ խաղեր է անցկացնում:

Մենք ուժեղ ենք պաշտպանությունում: Հարձակման գծում հզոր չենք, բայց ունենք Հեբերի նման հարձակվող: Նոմինալ հարձակվողի փոխարեն ունենք Ուրոշ Նենադովիչին»,-նշում է Խաշմանյանը:

Խաշմանյանը նշում է, որ թիմը կանի ամեն ինչ նորից հաջողությունների հասնելու համար:

«Մենք կստեղծենք պատմություն նորից» («We will make history again»),-վստահ է Խաշմանյանը:

Ասուլիսին ներկա էր նաև «Ալաշկերտի» կիսապաշտպան Արթուր Եդիգարյանը, ով նշում է, որ թիմը լավ պատրաստվել է հանդիպմանը, իրենց բարդ հանդիպում է սպասվում, բայց իրենք կանեն ամեն ինչ հաղթելու համար: