Մենք տիրել էինք նախաձեռնությանը, պահեր էինք ստեղծում, բայց մոռացանք գոլ խփել. Լուի Վան Գալ
«Մանչեսթեր Յունայթեդի» գլխավոր մարզիչ Լուի Վան Գալը իր կարծիքն է հայտնել Անգլիայի առաջնության 15-րդ տուրում «Վեսթ Հեմի» դեմ անցկացրած խաղի մասին (0:0):
«Կարծում եմ, մենք լավ հանդիպում անցկացրեցինք, միայն թե մեզ պետք է գոլ խփել: Պետք է ռեալիզացնել այն պահերը, որոնք մենք ստեղծում ենք: Պետք է խփել, այլապես չենք հաղթի: Դա նաև ֆուտբոլիստներին է վշտացնում, որովհետև նրանք ուզում են գոլ խփել: Մենք պետք է ավարտենք հարձակումներն ավելի լավ, քան այսօր:
Կարելի է ամեն օր մարզումների ժամանակ կատարելագործել դարպասին կատարած հարվածները: Դուք պետք է իմանաք, որ մենք դա անում ենք: Բայց գոլ խփելու համար անհրաժեշտ է ինքնատիրապետում և հաջողություն:
Ամենակարևորն այն է, որ մենք պահեր ստեղծում էինք: Այսօր մենք տիրել էինք նախաձեռնությանը և կրեատիվ էինք, սակայն մոռացանք գոլ խփել»,- ասել է Լուի Վան Գալը:
Պատրաստեց Անի Գաբուզյանը
