ԴԱԻՇ-ի ահաբեկիչները հաշվեհարդար են տեսել ՌԴ Անվտանգության դաշնային ծառայության գործակալի նկատմամբ
ԴԱԻՇ ահաբեկչական խմբավորման անդամները համացանցում տեղադրել են մի մարդու սպանության տեսագրություն, ով իրեն անվանում է ՌԴ Անվտանգության դաշնային ծառայության գործակալ: Զինյալները սպառնում են նաև Ռուսաստանին՝ խոստանալով նոր՝ արյունալի հարձակումներ:
Տեսագրությունում կարմիր կոմբինեզոնով մարդը ռուսերենով հայտարարում է, թե ինքը հավաքագրվել էր Անվտանգության դաշնային ծառայության կողմից 2014թ. ամռանը Մայկոպում, իսկ հետո ուղարկվել Իրաք՝ ԴԱԻՇ-ի վերահսկողության տակ գտնվող տարածքներ:
Նա պնդում է նաև, թե ծնունդով Գրոզնիից է: Այդ տեղեկությունը հաստատել, ինչպես նաև սպանության փաստը ճշտել դեռ հնարավոր չէ, հայտնում է BBC-ի ռուսական ծառայությունը:
ՌԴ Անվտանգության դաշնային ծառայության հասարակայնության հետ կապերի կենտրոնից ծառայությանը պատասխանել են, որ տեղեկություն չունեն այդ տեսանյութի մասին:
