«Հիշեցի իմ մանկությունը, ու այն, ինչ չկար իմ մանկությունում, ես փորձեցի փոխանցել երեխաներին». Ռիտա Սարգսյան
Երևանի թիվ 126 մանկապարտեզն այսուհետ կոչվելու է «Ժպիտներ», քանի որ հիմնանորոգումից հետո այն ժպիտ է պարգևում թե՛ երեխաներին, թե՛ ծնողներին։ Այսօր տեղի ունեցավ արդեն լիովին նոր ու ժամանակակից ստանդարտներին համապատասխանող մանկապարտեզի բացման արարողությունը, որին ներկա էին ՀՀ Առաջին տիկին Ռիտա Սարգսյանը, Երևանի քաղաքապետ Տարոն Մարգարյանը, Երևանի քաղաքապետարանի աշխատակազմի Հանրակրթության վարչության պետ Գայանե Սողոմոնյանը և այլ բարձրաստիճան պաշտոնյաներ, հյուրեր։
«Այսօր իրականություն դարձավ իմ աշխատողների և ծնողների բաղձալի երազանքը։ Այսուհետ ծնողների և երեխաների աչքերին վստահ ու համարձակ կնայենք»,- իր ելույթում ասաց մանկապարտեզի տնօրեն Լենա Լևոնյանը։
Իսկ Գայանե Սողոմոնյանն էլ նշեց, որ բացի բարերարից, շինարարությանն աջակցել է նաև «Լույս» հիմնադրամը, իսկ շինարարության ավարտից հետո քաղաքապետը մանկապարտեզին նվիրեց կահույք, գույք և սառնարաններ, Շենգավիթ վարչական շրջանի ղեկավարի կողմից մանկապարտեզի բակում տեղադրվել են ժամանակակից խաղային միջոցներ.
«Բոլորը փորձում էին որևէ օժանդակություն անել։ Թվում էր, թե ամեն ինչ պատրաստ է, սակայն տիկին Ռիտա Սարգսյանն ասում էր՝ ուզում եմ, որ մանկապարտեզը երեխաների համար գրավիչ լինի, և իրենց մայրիկների ու տատիկների հետ լաց լինելով չմտնեն մանկապարտեզ, նրանք հիշեն, որ մանկապարտեզում իրենց սիրում և սպասում են։ Ահա սա հիմք դարձավ, որ մանկապարտեզում հիմնվեց իր տեսակի մեջ եզակի ձմեռային այգի, որտեղ ապրում են մուլտերի և հեքիաթների հերոսները։ Բոլորս ուրախ ենք, ու այս ժպիտի արդյունքում է, որ որոշվեց մանկապարտեզն այսուհետ անվանել «Ժպիտներ»»։
ՀՀ Առաջին տիկին Ռիտա Սարգսյանը 168.am-ի և Sputnik-Armenia ռադիոկայանի հետ զրույցում պատմեց, թե ինչպես է ծնվել մանկապարտեզը վերանորոգելու գաղափարը։
«Մոսկվայում ինձ մոտեցավ մի բարերար ու ասաց, որ ինքը ցանկություն ունի Հայաստանի մանուկներին օգնել, ու ես էլ առաջարկեցի՝ այս մի նախագիծն էլ առողջ երեխաների համար անել։ Ես նախկինում մանկապարտեզի աշխատակից եմ եղել ու տեսել եմ, որ բոլոր մանկապարտեզներն ահավոր վատ վիճակում են, ինքը համաձայնեց։
Հետո դիմեցի քաղաքապետարան, ասացի՝ տվեք ամենամեծ ու ամենավատ վիճակում գտնվող մանկապարտեզի հասցեն։ Ինչո՞ւ մեծ. որպեսզի ավելի շատ երեխա այս բարիքներից օգտվի։ Այս մանկապարտեզում կա մոտ 400 երեխա։ Ու այդպես որոշեցինք, և արվեց շինարարությունը։ Մնացածը ես վերցրեցի ինձ վրա։ Աշխատանքները տևել են ընդամենը 6 ամիս։ Մանկապարտեզը հիմնովին վերանորոգվել է։ Իսկ նախագծի շարունակության համար սպասում ենք հաջորդ բարերարին»,- ասաց նա։
Մանկապարտեզի ձմեռային այգու բոլոր պարագաներն Առաջին տիկինը բերել է նաև իր բակից. «Իմ թոռնիկներն արդեն գնում են դպրոց, թող հիմա էլ ուրիշ բալիկներ ուրախանան»,- ասաց նա։
168.am-ն Առաջին տիկնոջից հետաքրքրվեց, թե ի՞նչ վառ դրվագ հիշեց իր մանկությունից, երբ մտավ վերանորոգված մանկապարտեզ։ «Երբ մտա ձմեռային այգին, հիշեցի, որ սովետական սև ու սպիտակ մանկությանս ժամանակ իմ դաստիարակչուհին ասում էր՝ դռները բացվում են, հեքիաթը սկսվում է։ Ու ես նույնն ասացի, երբ բացեցի ձմեռային այգու դուռը։ Հիշեցի իմ մանկությունը, ու այն, ինչ չկար իմ մանկությունում, ես փորձեցի փոխանցել երեխաներին»,-պատմեց նա։
