Խաչիկի գյուղապետին մտահոգում է բնակիչների թվաքանակի նվազումը
Վայոց Ձորի Խաչիկ գյուղի գյուղապետ Վարդան Ներսիսյանը կարծում է, որ սեպտեմբերի 25-ին գյուղում կայանալիք «Գաթա» խորագրով «Գյուղական ավանդույթներ» փառատոնն ինչ-որ կերպ կնպաստի գյուղի զարգացմանը, ինչպես նաեւ ավելի շատ հյուրեր ներգրավելուն: Նա հատկապես մտահոգված է բնակիչների թվաքանակի նվազմամբ:
«Կցանկանայի, որ գյուղական արտադրանքը, համայնքներում անցկացվող փառատոններն ավելի շատ լուսաբանվեին: Երկիրը սկսվում է սահմաններից: Կարծում եմ`ամեն մեկս պարտավոր ենք մեր աջակցությունը ցուցաբերել համայնքների զարգացմանը, այս դեպքում խոսքս միայն Խաչիկ գյուղին չի վերաբերում: Գյուղի խնդիրներից մեկը մարդկանց թվի նվազումն է: 300 աշակերտի փոխարեն այսօր մենք ունենք 90-ը: Բոլորս էլ ձգտում ենք ավելի լավ պայմաններում ապրել, սակայն մի բան կա, որ պետք է մարդուն պահի իր հողի վրա: Դա երկրի կայունությունն է եւ սահմանների ամրությունը»,- ասաց գյուղապետը:
