Երթի մասնակիցների մի մասը շարժվեց Սարի թաղի ուղղությամբ
Ճեղքելով ոստիկանական պատնեշը և անակնկալի բերելով ոստիկաններին՝ ցուցարարների մի մասը կարողացավ բարձրանալ Սարի թաղ, որտեղից ճանապարհ կա դեպի ՊՊԾ գնդի տարածք:
Ցուցարարները «Մենք ենք տերը մեր երկրի», «Սասնա ծռեր» և այլ վանկարկումներով ու սուլոցներով ներկայում արագ քայլերով անցնում են Սարի թաղի մութ փողոցներով:
Վերջիններս մտադրություն ունեն անցնել հենց այն հատվածով, որտեղ օրեր առաջ բախումներ էին տեղի ունեցել: Սարիթաղցիներն անձամբ են ցուցադրում ՊՊԾ գնդի մոտ տանող ճանապարհի ուղին:
Ստանալով լուրը, որ ցուցարարները գնում են Խորենացի փողոց, ոստիկանությունը մեծ ուժեր էր կուտակել այնտեղ, այնինչ երթն անակնկալ կերպով շարժվեց Սարի թաղի ուղղությամբ:
Ոստիկանների մի մասը ներկայում Խորենացի փողոցից արագորեն շարժվում է Սարի թաղի ուղղությամբ:
