Ադրբեջանի ՆԳՆ-ն Զաքաթալայում հատուկ օպերացիա է անցկացնում
Ադրբեջանական APA գործակալության տեղեկություններով՝ Ադրբեջանի ներքին գործերի նախարարությունը Զաքաթալայի շրջանում հատուկ օպերացիա է անցկացնում:
Գործակալությունը հաղորդում է, որ օպերացիան կապված է մի քանի օր առաջ Զաքաթալայի շրջանի Ալիաբադ ավանի ոստիկանական բաժանմունքում տեղի ունեցած պայթյունի հետ, ինչի հետևանքով ոստիկանության տեսուչ Ռովշան Բալիևը (1971թ.) վնասվածքներ էր ստացել: Ենթադրվում է, որ ինքնաշեն նռնակ է պայթել:
APA-ի հաղորդմամբ՝ ձերբակալվել է մի քանի մարդ, որոնք իբրև թե վահաբիտական հոսանքին են հարում:
Ադրբեջանական Contact.az կայքը նախօրեին հաղորդել էր, որ տվյալ շրջանում բազմիցս հարձակումներ են իրականացվել ոստիկանության ու իշխանությունների ներկայացուցիչների նկատմամբ:
Նշենք, որ Զաքաթալայի շրջանը բնակեցված է մեծամասամբ լեզգիներով, ավարներով:
