ԱՄՆ-ը մեծացնում է ԴԱԻՇ-ի նավթաբազաներին հասցվող հարվածների ինտենսիվությունը
Ամերիկյան ավիացիան սկսել է ավելի շատ հարվածներ հասցնել նավթարդյունահանող ոլորտին, որը գտնվում է ԴԱԻՇ-ի վերահսկողության ներքո, հայտնում է BBC-ն:
ԱՄՆ Պետդեպի հատուկ դեսպանորդ Ամոս Խոխշտեյնի խոսքով՝ վերջին մի քանի շաբաթներին ռմբակոծությունների բնույթը փոխվել է՝ կապված այն բանի հետ, որ ԴԱԻՇ-ը կարողացել է հարմարվել նավթարդյունահանող սարքավորումներին հասցված հարվածներին:
Ելույթում, որը հրապարակվել է ԱՄՆ Սենատի կայքում, հատուկ դեսպանորդը նշել է, որ ռմբակոծությունները դարձել են ինտենսիվ, իսկ դրանց թիրախ են դարձել «կարևորագույն, ռազմավարական նշանակության կարևոր օբյեկտները ԴԱԻՇ-ի տարածքում»:
Reuters-ի տվյալով՝ Խոխշտեյնը բացատրել է, որ ներկայում հարվածներն սկսել են հասցվել անմիջականորեն նավթի արդյունահանման վայրերին: Ելույթի տեքստում այլ բացատրություններ տրված չեն:
Պենտագոնի հաշվարկով՝ ամերիկյան ավիացիայի հարվածների հետևանքով վերջին ամիսներին ահաբեկիչների՝ նավթից ստացված հասույթը կրճատվել է գրեթե կիսով չափ:
