Բաժիններ՝

Վլադիմիր Գասպարյանը՝ զինված խմբի վնասազերծման և հանրաքվեի մասին. «Սադրիչներ պահում են նրանք, ովքեր շատ են խոսում խաղաղությունից»

Նոյեմբերի 30-ին ոստիկանության պետ Վլադիմիր Գասպարյանն անցկացրեց օպերատիվ խորհրդակցություն, որին մասնակցում էին կոլեգիայի անդամներ, գլխավոր և մարզային վարչությունների պետեր, վարչությունների ու տարածքային բաժինների ղեկավարներ:

Անդրադառնալով զինված հանցախմբի՝ օրերս տեղի ունեցած վնասազերծմանը՝ Վլադիմիր Գասպարյանը դրական գնահատեց ոստիկանության ստորաբաժանումների մասնակցությունն այդ պատասխանատու և վտանգավոր գործողությանը:

Միևնույն ժամանակ, ոստիկանության պետը մտահոգություն հայտնեց հանրության որոշ խմբերի գնահատականի վերաբերյալ և զգոնության ու անաչառության կոչեց բոլոր նրանց, ում անվտանգությունը նույնպես ապահովվել է այդ գործողության մասնակիցների պրոֆեսիոնալիզմի շնորհիվ:

Վլադիմիր Գասպարյանն անդրադարձավ նաև զանգվածային միջոցառումների ընթացքում հասարակական կարգի պահպանման և մասնակիցների անվտանգության ապահովման խնդիրներին և անդրադառնալով այդ միջոցառումների կազմակերպիչների՝ ոստիկանությանն ուղղված հայտարարությանը՝ տվեց կոնկրետ ցուցումներ ու հանձնարարականներ:

Այնուհետև ոստիկանության պետի առաջին տեղակալ Հունան Պողոսյանը խորհրդակցության մասնակիցներին ցուցումներ տվեց Սահմանադրության փոփոխությունների հանրաքվեի նախապատրաստման և ծառայության կազմակերպման ուղղությունների վերաբերյալ:

Խոսելով վնասազերծման աշխատանքները շոու անվանողների մասին՝ Վ. Գասպարյանն ասաց, թե շոու սարքում են նրանք, ովքեր շատ են խոսում խաղաղությունից: «Երբ խոսում են խաղաղ ամեն ինչից, ես վախենում եմ, որովհետև խաղաղությունից խոսացողը պատերազմի է պատրաստվում»: Նրա խոսքով՝ ԱԱԾ-ն ու ոստիկանությունը սադրիչներ չունի, սադրիչներ պահում են նրանք, ովքեր շատ են խոսում խաղաղությունից:

Ի դեպ, Վ. Գասպարյանն ասել է, որ խմբի վնասազերծման գործընթացը տևել է 50 վայրկյան:

 

Բաժիններ՝

Տեսանյութեր

Լրահոս