ԱՄՆ-ն իր դիվանագետների ընտանիքներին խորհուրդ է տվել հեռանալ Թուրքիայից
ԱՄՆ իշխանություններն իրենց օգնությունն են առաջարկել զինծառայողների ու դիվանագետների ընտանիքներին Թուրքիայի Ադանա քաղաքում տեղակայված «Ինջիրլիք» ռազմաբազայից հեռանալու հարցում:
Որոշումը կապված է ԴԱԻՇ-ի դեմ պայքարում Թուրքիայի ընդգրկված լինելու հանգամանքով:
Ամերիկյան իշխանությունների առաջարկի մասին հայտնում է The Wall Street Journal-ը՝ հղում կատարելով քաջատեղյակ աղբյուրներին:
ԱՄՆ-ը չի պահանջում, որ իր առաքելության աշխատակիցների ընտանիքները լքեն Թուրքիան, սակայն կհոգա նրանց ծախսերը, եթե նրանք ցանկանան վերադառնալ ԱՄՆ: Զինծառայողների ու դիվանագետների ընտանիքները մտածելու համար ունեն 30 օր:
Նախազգուշացվել է մոտ 350 մարդ, ու նրանցից ոմանք ցանկություն են հայտնել հեռանալ Թուրքիայից:
ԱՄՆ Պետդեպարտամենտի ներկայացուցիչ Մարկ Թոների խոսքով՝ որոշումը կապված է այն բանի հետ, որ ԱՄՆ-ն ու Թուրքիան պայմանավորվել են օգտագործել «Ինջիրլիքը» Սիրիայում ԴԱԻՇ-ի դեմ պայքարում:
ԱՄՆ Պետդեպարտամենտը նախազգուշացրել է նաև ամերիկացիներին Թուրքիա ճանապարհորդելու վտանգավորության մասին:
