Տրանսպորտային կոլապս Վերին Լարսում. մաքսատունն արգելակում է Հայաստանից պտուղ-բանջարեղենի ներկրումը. rusarminfo
Վերին Լարսի սահմանային անցակետում գոյացել է բազմակիլոմետրանոց խցանում: Հայաստանից մոտ 150 ծանր բեռնատար մեքենա կանգնած է տարանցիկ մաքսազերծման հերթում:
Հայաստանից ընթացող ավտոշարասյունը հարկադրված է սպասել ռուսաստանյան սահմանի մոտակայքում 6-ից 8-ը օր, RUSARMINFO-ի թղթակցի հետ զրույցում հայտնել է Հայաստանի արդյունաբերողների և գործարարների միության նախագահ Արսեն Ղազարյանը:
«Դա շատ մեծ ծախսեր է պահանջում, մեծ է պայմանագրերը կորցնելու և պտուղ-բանջերեղենի փչացման հավանականությունը»:
RUSARMINFO-ի զրուցակիցը նշել է, որ խցանումներ գոյացել են երկու կողմում` և վրացական, և ռուսական հատվածներում:
«Այն բանից հետո, երբ մենք դարձանք ընդհանուր տնտեսական միության անդամ, զգալիորեն ավելացել է նաև Ռուսաստանից Հայաստան ներմուծումը: Եվ ներկայիս իրավիճակում մեծ կորուստներ են կրում ինչպես հայաստանյան, այնպես էլ ռուսաստանյան արտահանողները»:
Գերբեռնվածության գոյացման պատճառը, ըստ Ղազարյանի, ռուսաստանյան մաքսատան դանդաղ և ոչ կոմպետենտ աշխատանքն է:
«Այս գործընթացը կապ չունի տեխնիկական կանոնակարգի կամ մաքսային ընթացակարգերի հետ, պատճառը ռուսաստանյան մաքսատան ոչ արդյունավետ համակարգչային ծրագիրն ու աշխատակիցների դանդաղաշարժությունն է»:
Իր հերթին Հայաստանի արտադրողների միության նախագահ Վազգեն Սաֆարյանը RUSARMINFO-ի հետ զրույցում հայտնել է, որ ներկայումս առավել ակնհայտ է Հայաստանից Ռուսաստան արտահանման ընդհանուր ծավալի կրճատման միտումը: Որպես ստեղծված իրավիճակի պատճառ նա դիտարկում է ռուսաստանյան ռուբլու արժեզրկումը:
«Եթե երկու տարի առաջ մեր արտահանումը կազմում էր 334 միլիոն ռուբլի, ապա վերջին 6-7 ամիսներին այդ ցուցանիշը նվազել է մինչև 5-6 միլիոնի»:
Նշենք, որ համաձայն Ազգային վիճակագրական ծառայության տվյալների, Հայաստանի արտաքին առևտրաշրջանառությունը 2015-ի 7 ամիսների ընթացքում կազմել է 2,657 մլրդ դոլար` կրճատվելով 19,9%-ով 2014-ի նույն ժամանակահատվածի համեմատությամբ:
