Դժբախտ պատահարի հետևանքով մահացել է Համահայկական խաղերի մասնակիցը
ՀՄՀԿ-ի մամուլի քարտուղարությունը տեղեկացնում է, որ օգոստոսի 1-ին դժբախտ պատահար է տեղի ունեցել Ծաղկաձորում: Համահայկական ամառային 6-րդ խաղերին մասնակցելու նպատակով ԱՄՆ-ից Հայաստան ժամանած 20-ամյա Լևոն Թովմասը մինչև Համահայկական խաղերի պաշտոնական մեկնարկը որոշել էր թիմակիցների ու նրանց հարազատների հետ հանգստի նպատակով մեկնել Ծաղկաձոր, որտեղ վթարի է ենթարկվել։ ՃՏՊ–ի հետևանքով երիտասարդը մահացել է:
Համահայկական խաղերի համաշխարհային կոմիտեն իր խորին ցավակցությունն է հայտնել մահացած երիտասարդի ընտանիքին, հարազատներին և թիմակիցներին:
Համահայկական խաղերի համաշխարհային կոմիտեն կոչ է արել Համահայկական ամառային 6-րդ խաղերի բոլոր մասնակիցներին և հյուրերին հնարավորինս զգոն լինել սեփական նախաձեռնություններում և զերծ մնալ վտանգ պարունակող գործողություններից:
Սիրարփի Աղաբաբյան
