Կիսապաշտպան Յան Մ’Վիլլան հաստատել է Մոսկվայի «Դինամոյում» լեգեոներներից գումար շորթելու փաստերը
Ակումբի աշխատակիցները ճնշում են գործադրում մոսկովյան «Դինամոյի» արտասահմանցի ֆուտբոլիստների վրա:
Ֆրանսիացի կիսապաշտպանը պատմել է, որ Դինամոյի անվտանգության ծառայության ղեկավար Պավել Կոնովալովն իրենից 10 հազար դոլար է պահանջել` ակումբի կողմից ժամանակավոր վարձակալած բնակարանի դիմաց: Ընդ որում, ինչպես հաղորդում է LifeNews-ը, ֆուտբոլիստը դեռևս գործող պայմանագիր ակումբի հետ չունի.
– Յան, դա ճի՞շտ է, որ Դուք աշխատավարձ «Դինամոյում» չեք ստացել, բայց Ձեզանից գումար են պահանջել:
– Այո, դա ճիշտ է:
– Դա ինչ-որ ձևով խանգարո՞ւմ է մարզումներին:
– Ինչպե՞ս կարելի է կենտրոնանալ այդպիսի իրավիճակում, եթե նրանք անընդհատ ճնշում են գործադրում ինձ վրա:
– Ընդհանրապես, ինչ-որ տեղ` Եվրոպայում, Դուք այսպիսի իրավիճակի հանդիպե՞լ եք:
– Ոչ մի տեղ: Սա ինձ համար շոկ էր:
– Այս կապակցությամբ չունե՞ք արդյոք այստեղից շուտ հեռանալու ցանկություն:
– Ես այնպիսի շոկի մեջ եմ պատահածից, որ նույնիսկ չեմ կարողանում մտածել այդ թեմայի շուրջ:
Երկուշաբթի հայտնի դարձավ այս սկանդալի մասին, որ տեղի էր ունեցել «Դինամոյում»: Պարզվել է, որ անվտանգության ծառայության ղեկավարը ֆրանսիացի ֆուտբոլիստից պահանջել է 10 հազար դոլար, որից հետո ծեծել է թարգմանիչ Իգոր Ցարուշին, ով, ակումբի աշխատակցի կարծիքով, վատ էր թարգմանում Յանին` պահանջվող ինֆորմացիան: Մ’Վիլլան ստիպված էր դուրս գալ բնակարանից, սակայն ավելի ուշ նա վերադարձել է իր բնակարան` զինվելով սովորական կացնով:
Իգոր Ցարուշը շաբաթվա սկզբին պատմել է, որ «Դինամոյում» գործում է տուգանքների համակարգ` սպորտսմենների կատարած յուրաքանչյուր զանցանքի համար: Շահույթը գնում է ակումբի ադմինիստրատոր Վիկտոր Կուզմինին և անվտանգության ծառայության ղեկավար Պավել Կոնովալովին:
Պատրաստեց Անի Գաբուզյանը
