«Կադրերի բաժին N 168»-ում Արտակ Գևորգյանն է. «Левиафан»
Ֆեյսբուքյան ակտիվիստ Արտակ Գևորգյանը ( Аугусто Пиночет) հայտնի է կինոյի նկատմամբ ունեցած իր յուրահատուկ նախընտրություններով, որոնցով նա պարբերաբար կիսվում է սոցիալական ցանցում ընդգրկված ընկերների հետ: Ու, քանի որ այդ տիրույթում նրա ընկերներից մեկն էլ ես եմ, հաճախ առիթ եմ ունենում նայելու հենց իր առաջարկած ֆիլմերից, որոնցից մեկն այսօր՝ նրա հետ միասին, ներկայացնում ենք 168.am-ի ընթերցողներին:
Այսպիսով «Կադրերի բաժին N 168»-ում Արտակ Գևորգյանն է, ով մեր ընթերցողներին այս երկուշաբթի առաջարկում է նայել ռուս ռեժիսոր Անդրեյ Զվյագինցևի «Լևիաթանը»: Ֆիլմը սոցիալական դրամա է՝ նկարահանված 2014 թ. Ռուսաստանում: Գլխավոր դերերում նկարահանվել են Ալեքսեյ Սերեբրյակովը, Ելենա Լյադովան, Վլադիմիր Վդավիչենկոն, Ռոման Մադյանովը:
Աստվածաշնչյան կերպար Լևիաթանը ֆիլմում մարմնավորում է պետական իշխանության մետաֆորան, որ ընդունակ է ոչնչացնել ցանկացած մարդկային բնություն և ազատություն: Ֆիլմի հերոսի՝ Պրիբրեժնի քաղաքի փոքր մարդ, ավտոփականագործ Նիկոլայի դիմակայությունը՝ պահպանելու սեփական տունը, դատապարտված է պարտության, քանի որ այլաբանական հրեշը՝ Լևիաթանը, չի խղճալու ոչ ոքի և, թերևս, անօգնական հակառակորդին անհավասար պայմաններոմ պայքարի իրավունք չի տալու: Ֆիլմի եզրափակիչ տեսարանը վերջաբանի հետ միահյուսված` Նիկոլայի տան ավերակների վրա կառուցած եկեղեցու առկայությունն է, որտեղ հնչում է հոգևորականի` դատավճիռ հիշեցնող քարոզը: Եկեղեցի, որի մթնոլորտում մեղքն է կախված, չներված մեղքը, գոնե երկրի վրա՝ չներված:
Անդրեյ Զվյագինցևի անունը հայտնի է հայաստանյան կինոսերների նեղ շրջանակին: Պատճառը գուցե ռեժիսորի ֆիլմերի փառատոնային կյանքն է, և այս ֆիլմը նույնպես զերծ չէ մի շարք մրցանակներից, այդ թվում՝ արժանացել է ամերիկյան հեղինակավոր «Գոլդեն գլոբուս» կինոփառատոնի «Լավագույն արտասահմանյան ֆիլմ» մրցանակին։
Արտակ Գևորգյանն իր առաջարկած ֆիլմի մասին գրում է. ««Լևիաթանը» պատմում է հետխորհրդային մի ամբողջ՝ պետական, իրավական ու հոգևոր աննորմալ ու անառողջ համակարգի մասին, որը, իմ կարծիքով, շատ նմանություններ ունի նաև այն հասարակարգի հետ, որտեղ հիմա մենք ապրում ենք: Կարծում եմ, ֆիլմն արժե նայել այնտեղ նկարագրվող իրավիճակներից խուսափելու կամ դրանք բացառելու համար»:
Ֆիլմը կարող եք դիտել այստեղ`
168.am-ը մաղթում է հաճելի կինոդիտում։
Խորագիրը վարում է Նվարդ Մանվելյանը
