Օբաման կողմնորոշվել է, թե ով է զբաղեցնելու ԱՄՆ զինված ուժերի բարձրագույն պաշտոնը
Բրիտանական Reuters լրատվական գործակալության փոխանցմամբ՝ ԱՄՆ նախագահ Բարաք Օբաման բանակի բարձրագույն պաշտոնի՝ շտաբների պետերի միացյալ կոմիտեի ղեկավարի համար առաջադրել է գեներալ Ջոզեֆ Դանֆորդի թեկնածությունը:
59-ամյա Դանֆորդը ներկայումս Ծովային հետևակի կորպուսի հրամանատարն է, իսկ մինչ այդ երկու տարի գլխավորել է Աֆղանստանում անվտանգություն ապահովող միջազգային ուժերը: Ակնկալվում է, որ Դանֆորդը կփոխարինի գեներալ Մարտին Դեմփսիին, ով այս տարվա աշնանը վայր է դնելու իր լիազորությունները:
ԱՄՆ զինված ուժերի ղեկավարման բարձրագույն մարմնի նախագահի պաշտոնում նշանակվելու համար Դանֆորդի թեկնածությունը պետք է հաստատվի ԱՄՆ Կոնգրեսի Սենատի կողմից: Օբաման գեներալ Փոլ Սելվի թեկնածությունն է առաջադրել ԱՄՆ-ի զինված ուժերի ղեկավարի տեղակալի պաշտոնում: