Լիոնել Մեսսիի՝ «Բարսելոնայի» հետ առաջին պայմանագիրը կնքվել է սրճարանում՝ անձեռոցիկի վրա
Հանճարեղ «թզուկը»՝ Լիոնել Անդրես Մեսսի. Փոքրամարմին, ցածրահասակ, բայց տաղանդավոր և հանճարեղ:
Թվում է՝ արգենտինացի ֆուտբոլիստ Լիոնել Անդրես Մեսսիի մասին ասված է ամեն բան: Նրա մասին գիտեն բոլորը, նրա մասին խոսում են բոլորը, բայցևայնպես, Մեսսիի կյանքում կան շատ իրողություններ, որոնց մասին քչերը գիտեն: Առաջարկում ենք ծանոթանալ Մեսսիի կյանքի ամենահետաքրքիր և ուշագրավ այն փաստերին, որոնց մասին դեռևս շատ չի խոսվել:
Մեսսին աշխարհի ամենահայտնի արգենտինացիներից մեկն է, Արգենտինայի հավաքականի անվիճելի առաջատարը, բայց նրա արմատները բնավ արգենտինական չեն: Մեսսիի արմատներն Իտալիայից են, իտալական Անկոնա քաղաքից: Մեսսիներիի՝ Արգենտինայի հետ կապը սկսվել է 1883 թվականից, երբ Մեսսիի պապն Իտալիայից գաղթել է Արգենտինա:
Լիոնել Մեսսին մեծացել է Արգենտինայում, հասարակ ընտանիքում: Մեսսի հայրը՝ Խորխե Մեսսին, հասարակ բանվոր էր, իսկ մայրն ազատ ժամանակ հավաքարարություն էր անում: Մեսսիի ծնողները ֆուտբոլի մեծ երկրպագու էին և մանկուց իրենց տղայի մեջ սերմանել են սերը դեպի ֆուտբոլը: Ամեն օր Մեսսիի հայրը որդու հետ կտրում էր ավելի քան 60 կիլոմետր ճանապարհ՝ «Նուելս Օլդ Բոյս» ակումբի մարզումներին հաճախելու համար: Մարզումներից բացակայելը Մեսսիին խստիվ արգելվում էր: Մեսսիի մասին պատմող ֆիլմում ասվում է, որ այս արգելքը Մեսսիի համար պատրվակ էր դարձել. նա հաճախ էր խնդրում մայրիկին՝ չտանել իրեն դպրոց, որպեսզի նա հանգստանա ու, հետևաբար՝ ակտիվ մասնակցի մարզումներին: Մայրը չէր կարող մերժել տղայի նման խնդրանքը:
Դեռ մանկուց Մեսսին աչքի էր ընկնում ճարպկությամբ և գնդակի հետ վարվելու արտասովոր տաղանդով: Նա, սակայն, մարզումների ընթացքում աչքի էր ընկնում ոչ միայն ակտիվությամբ և խփած գոլերով, այլև տարիքի համեմատ շատ ցածր հասակով:
Փոքր տարիքում Մեսսիին հատուկ բուժում էին նշանակել, նա պարբերաբար օգտագործում էր հասակի աճին նպաստող հորմոններ: Եթե Մեսսին չստանար բուժման հատուկ կուրսը, ապա նրա հասակը այսօր չէր գերազանցի 140 սանտիմենտրը (այժմ Մեսսին ունի 169 սմ հասակ): Մեսսիի բուժումը խնդիրներ է առաջացրել ոչ միայն նրա մարզավիճակի, այլև ակումբային կարիերայի վրա: Մի շարք հայտնի արգենտինական ակումբներ հրաժարվել են Մեսսիին իրենց կազմում տեսնել, քանի որ չէին կարող ամսական 900 դոլար վճարել Մեսսիի բուժման համար:
Բուժման հետ կապված ծախսերը չվախեցրեցին «Բարսելոնայի» մարզական տնօրեն Կառլես Ռեկսաչին: Տեսնելով տաղանդավոր պատանուն՝ Ռեսկաչը Մեսսիի հորն առաջարկեց տղային ընդգրկել «Բարելոնայի» մանկապատանեկան թիմի կազմում: Կար մեկ պայման. Լեոն իր ընտանիքի հետ պետք է տեղափոխվեր Իսպանիա: Մեսսիների ընտանիքն Իսպանիայում 3 ամիս ապրելուց հետո, որոշեց թողնել ամեն բան և վերադառնալ Արգենտինա: Այս մասին իմանալով՝ Կառլես Ռեսկաչը հենց ռեստորանում համոզեց ավագ Մեսսիին կնքել պայմանագիր «Բարսելոնայի» հետ: Հետաքրքիր է, որ այս պայմանագիրը կնքվել է սրճարանում՝ անձեռոցիկի վրա:
Այս պայմանագրով էլ սկսվեց Մեսսիի պրոֆեսիոնալ կարիերան «Բարսելոնայի» կազմում: Մեսսին դարձավ «Բարսելոնայի» լեգենդներից մեկը, նա շրջանցեց հնարավոր և անհնար գրեթե բոլոր ռեկորդները:
Ֆուտբոլում Մեսսիի մոտ ստացվում է ամեն բան, բայց չար լեզուները տարածում են խոսակցություններ, որ անձնական կյանքում Մեսսին այնքան էլ հաջողակ չի եղել:
Եթե հավատանք մամուլում տարածված տեղեկություններին, ապա Մեսսիի կյանքում եղել է 3 կին: Մակարենա Լեմոսի հետ ֆուտբոլիստին ծանոթացրել է նրա հայրը, երբ Մակարենան ընդամենը 14 տարեկան էր: Չնայած խոսակցություններին՝ Մեսսին մեկ անգամ չէ, որ նշել է, որ Մակարենայի հետ ունեցել է զուտ ընկերական կապ: Այլ պատմություն էր Playboy-ի աստղ Լուսիանա Սալասարի հետ, ով մեծ էր Լեոյից 7 տարով: Այս հարաբերությունները երկար չտևեցին: Վերջապես 3-րդ փորձից, կարծես, Մեսսիի մոտ ստացվեց ունենալ լուրջ և հասուն հարաբերություններ: Իր ներկայիս ընկերուհու՝ Անտոնելլա Ռակուցոյի հետ Մեսսին ծանոթ է 5 տարեկանից. նրանք մեծացել են մեկ բակում: Անտոննելան և Մեսսին թեև դեռ օրինական ամուսիններ չեն, բայց արդեն ունեն մեկ որդի՝ Տիագո Մեսսին:
Օրերս էլ Մեսսին իր Instagram-ի էջում տեղադրել էր մի լուսանկար, որտեղ ասվում էր, որ նրանք սպասում են իրենց 2-րդ որդուն:
Ի դեպ, Մեսսիի և իր մշտական հակառակորդ Կրիշտիանու Ռոնալդուի ծննդյան օրերի մեջ տարբերությունը 869 օր է, ուղիղ այդքան տարբերություն էլ կա Մեսսիի որդու ՝ Տիագոյի և Ռոնալդուի որդու՝ կրտսեր Կրիշտիանուի ծննդյան օրերի միջև:
Ընդամենը 28 տարեկան Լիոնել Մեսսին արդեն կարողացել է դառնալ ֆուտբոլի պատմության լավագույն ֆուտբոլիստներից մեկը: Նա կերտում է նոր պատմություն: Անկախ նրանից, թե որ ակումբի երկրպագու ենք, անկախ մարզաշապիկի գույնից, չենք կարող ժխտել, որ «կապտանռնագույնների» առաջատարը 21-րդ դարի ֆուտբոլային պատմության գլխավոր հերոսներից մեկն է:
Սիրարփի Աղաբաբյան